Уч нафар теннисчимиз Грузия турнирида қатнашмоқда
Грузияда теннис бўйича эркаклар ўртасида M25 тоифасига кирувчи “Kutaisi Open” халқаро турнирида уч нафар вакилимиз – Денис Истомин, Сергей Фомин ва Максим Шин яккалик ҳамда жуфтлик беллашувларида бош соврин учун кортга чиқади.
Аниқроқ айтадиган бўлсак, мусобақанинг жуфтлик баҳсларида Сергей Фомин италиялик шериги Александр Бинда билан тандемда нейтрал теннисчи Евгений Филиппов ва арманистонлик Даниил Саркисян дуэтига қарши кортга чиқадиган бўлди. Тажрибали теннисчимиз Денис Истомин эса Максим Шин билан биргаликда руминиялик Лукаш Густин ва қанадалик Николалон жуфтли билан тўқнаш келади.
Шунингдек, мукофот жамғармаси 30 минг АҚШ долларини ташкил этувчи “Kutaisi Open” турнирида мамлакатимизнинг биринчи рақамли теннисчиси Сергей Фомин ва Максим Шин яккаликлар ўртасидаги иштирокини асосий тўрнинг биринчи даврасидан бошлайди.
Уларга айни вақтда давом этаётган саралаш босқичида ғолиб бўлган теннисчилар рақиблик қилади.
Жавоҳир Тошхўжаев,
ЎзА
