Трампнинг Эрон бўйича режаси, Зеленскийнинг хавотири ва Пекиндаги стратегик музокаралар
АҚШ президенти Дональд Трамп ҳаж мавсуми якунланганидан сўнг Эронга қарши ҳарбий ҳаракатларни қайта тиклаши мумкинлиги ҳақида хабарлар тарқалди. Бу ҳақда Middle East Eye нашри манбаларга таяниб маълум қилди. Маълумотларга кўра, АҚШнинг Форс кўрфазидаги иттифоқчилари кескин босқичдаги ҳужумлар айнан ҳаж зиёрати даврида амалга оширилмаслигини сўраб, минтақавий беқарорлик ва зиёратчилар хавфсизлиги билан боғлиқ хатарларни урғулаган. Хабарда айтилишича, БАА, Саудия Арабистони ва Қатар аввалроқ Вашингтондан ҳужумларни вақтинча тўхтатишни сўраган, шу сабабли айрим ҳарбий режалар кечиктирилган. Шу билан бирга, манбаларга кўра, можаро ҳаж мавсуми тугаганидан кейин яна кучайиши мумкинлиги эҳтимоли тилга олинмоқда, бироқ расмий тасдиқлар очиқ эълон қилинмаган.
<iframe width="650" height="420" src="https://www.youtube.com/embed/uGDjGVtHjhw" title="Трампнинг Эрон бўйича режаси, Зеленскийнинг хавотири ва Пекиндаги стратегик музокаралар" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Украина президенти Владимир Зеленский Россия Чернигов–Киев йўналиши орқали урушни кенгайтириш бўйича бешта сценарий тайёрлаганини маълум қилди. Бу ҳақда у Олий бош қўмондонлик штаби йиғилишидан сўнг баёнот бериб, шимолий йўналишдаги разведка маълумотлари батафсил таҳлил қилинганини билдирган. Зеленский Украина бу таҳдидларга қарши ҳарбий ва дипломатик чораларни кучайтираётганини айтди. Унинг сўзларига кўра, Беларусь омили ва Россия билан қўшма ҳарбий фаолликлар хавфни янада оширмоқда, шу сабабли Украина ҳар бир эҳтимолий сценарийга алоҳида жавоб тайёрламоқда.
АҚШ расмийлари Эбола вируси билан боғлиқ чекловларга қарамай, Конго Демократик Республикаси футбол терма жамоасининг 2026 йилги Жаҳон чемпионатида иштирок этиши учун мамлакатга киришига рухсат берилишини тасдиқлади. Бу ҳақда Давлат департаментига таяниб Al Jazeera хабар берди. Маълумотларга кўра, Конго DR, Уганда ва Жанубий Судандан келган чет элликлар учун жорий этилган 21 кунлик кириш тақиқи мавжуд бўлса-да, терма жамоа ушбу қоидадан истисно қилинади. Расмийлар футболчилар зарур бўлса махсус тиббий назорат ва протоколлар асосида қабул қилиниши, оддий мухлислар учун эса чекловлар ўз кучида қолишини билдирган.
Британиянинг Radio Caroline радиостанцияси техник хатолик сабабли қирол Чарльз III вафот этганини эфирда нотўғри эълон қилиб юборди. Бу ҳақда The Guardian хабар берди. Кейинчалик станция раҳбариятига кўра, бу ҳолат “Monarch” деб номланган фавқулодда протоколнинг тасодифан ишга тушиб кетиши билан боғлиқ бўлган. Эфир давомида анъанавий “God Save the King” мадҳияси янграган ва дастур вақтинча тўхтатилган, бироқ орадан 15 дақиқа ўтиб хатолик аниқланиб, узр сўралган. Радиостанция бу носозлик компьютер тизимидаги хато туфайли юз берганини билдирган, қирол Чарльз III эса воқеа пайтида Шимолий Ирландияда бўлгани маълум қилинди.
Исроил ҳарбийлари Ғазога гуманитар ёрдам олиб кетаётган “Sumud” флотилияси иштирокчиларини қўлга олгани ҳақида хабар берилди. The Times of Israel маълумотига кўра, ушбу ҳолат ортидан Исроил миллий хавфсизлик вазири Итамар Бен-Гвир томонидан эълон қилинган видео халқаро майдонда кенг муносабат уйғотган. Видеода ҳибсга олинган фаоллар қўллари орқасига боғланган ҳолда сақлангани ва бетон майдончада тиз чўктирилиб, Исроил мадҳиясини тинглашга мажбур қилингани кўрсатилган. Мазкур ҳолат Европа ва бир қатор Ғарб давлатлари томонидан кескин танқид қилиниб, Исроил расмийлари ичида ҳам баҳс ва норозиликларга сабаб бўлгани билдирилмоқда.
Россия президенти Владимир Путин ва Хитой раиси Си Цзиньпин Пекинда бўлиб ўтган музокаралар якунлари бўйича қарийб 40 та ҳужжатни имзолади. Улар орасида кўп қутбли дунё тартибини шакллантириш, стратегик ҳамкорликни чуқурлаштириш ва турли соҳалардаги шерикликни кенгайтиришга доир қўшма декларациялар ҳам борлиги билдирилди. Шу билан бирга, асосий иқтисодий масалаларда, хусусан “Сила Сибири – 2” газ қувури қурилиши ва Россия гази нархи бўйича якуний келишувга эришилмагани қайд этилди. Томонлар умумий йўналиш бўйича келишган бўлса-да, лойиҳа муддати ва шартлари очиқ қолмоқда, Пекин эса ҳозирча мавжуд қувурлар орқали газ импортни кенгайтиришга устуворлик беряпти.
Samsung Electronics раҳбарияти иш ташлаш бошланишига атиги бир ярим соат қолганида ходимлар касаба уюшмаси билан иш ҳақи бўйича келишувга эришди. Financial Times хабарига кўра, бир неча кун давом этган музокаралардан сўнг томонлар Жанубий Корея меҳнат вазири Ким Ёнхун иштирокида якуний келишувга келган. Келишувга биноан, яримўтказгичлар бўлинмаси ходимлари компания операцион фойдасининг 10,5 фоизини бонус сифатида олиши ва ўртача иш ҳақи 6,2 фоизга оширилиши кўзда тутилган. Мутахассислар бу келишув иш ташлашнинг олди олинганини, акс ҳолда у Жанубий Корея иқтисодиёти ва глобал яримўтказгичлар занжирига жиддий таъсир кўрсатиши мумкинлигини таъкидлашган.
Нозимбек Мардонов, Салим Обиджонов ЎзА
