Трамп ва IT-компаниялар раҳбарлари келишув имзолади (+видео)
АҚШ Президенти сунъий интеллект соҳасида иш олиб бораётган энг йирик компаниялар – Google, Anthropic, Meta, OpenAI раҳбарлари билан учрашди. Мулоқот якуни бўйича СИ ривожини назорат қилишга қаратилган қўшма келишув имзоланди. Бу ҳақда DW ёзган.
Битимга кўра, ҳар бир компания СИ моделини тайёрлаш ва амалиётга жорий этиш босқичида кибернетика, биология ва кимё соҳаларидаги хатарлар билан боғлиқ хавфсизлик меъёрига мувофиқликни назорат қилиш учун “ишончли ички механизм” яратиши шарт. Аниқланган таҳдид ёки муаммо бартараф этилиши лозим.
Шунингдек, IT-компаниялардан мустақил аудиторлар билан ҳамкорлик қилиш ва СИ тизими хавфсизлигини ошириш стандарти ҳамда усулларини ишлаб чиқишга қаратилган қўшма йиғинларда мунтазам иштирок этиш сўралади.
Трамп айтишича, мазкур келишув компаниялар учун мажбурий эмас. Агар корхона муайян шартга риоя этмаган тақдирда ҳам қоида ижросини суд орқали таъминлашнинг иложи йўқ. Ҳужжат асосан компанияларнинг ихтиёрий мажбуриятига таянади.
Бироз аввалроқ Америка етакчиси СИ масаласи билан шуғулланадиган махсус “Сунъий интеллект кучлари” тузилишини эълон қилган эди. Қолаверса, Трамп бундай технологиялар тараққиётига тўсқинлик қилмоқчи эмаслигини ҳам билдириб, АҚШ бу соҳада Хитойдан ўзиб кетишини хоҳлаётганини таъкидлаган.
Айни ташаббус СИ моделлари назоратдан чиқиб кетган, яъни тест шароитида интернетга тарқалган ва хакерлик ҳужумлари амалга оширилган ҳолатлар ҳақида хабарлар кескин кўпайган бир пайтга тўғри келди.
“The New York Times” газетаси ёзишича, бозордаги айрим субъектлар етакчи IT-компаниялар сунъий интеллектдан келиб чиқадиган хавфни бўрттириб кўрсатяпти, деб ҳисоблайди. Яъни, йирик компаниялар шу йўл билан ўз дастурчиларини янги ҳодисалар учун жавобгарликдан халос қилиб, ўзаро келишган ҳолда рақобатни чеклайдиган бир гуруҳга айланишга ҳаракат қилаётган бўлиши мумкин.
Кенжа Бекжонов, Анвархўжа Аҳмедов, (видео) ЎзА
