Тошкент марказий темир йўл вокзалидан 25 июнь куни соат 23:58 да "Тошкент – Волгоград – Тошкент" йўналишидаги 324/323-сонли Халқаро йўловчи поезди жўнаб кетгани ҳақида хабар берган эдик.

Ушбу поезд ўз манзили – Россия Федерациясининг “Волгоград” темир йўл вокзалига 28 июнь куни соат 09:56 да етиб боради. 

Айни пайтда поезд манзил томон шитоб билан кетмоқда. Биз йўловчиларининг фикрлари билан қизиқдик.

– Ушбу поезд қатновининг қайта тикланганидан жуда хурсандмиз, – дейди йўловчи Муяссар Худойберганова. – Икки йилдан кўпроқ вақтдан сўнг, пандемия чекловлари бекор қилингандан кейин илк бора қатнови йўлга қўйилган поездда яратилган шароитлар аъло даражада. 

Тоза чойшаб, ёстиқжилд ва сочиқ берилди. Тўшак ва ёстиқларнинг ҳолати ҳам яхши. Вагонда самовар қайнаб турибди, ичимлик суви ҳам бор. Умуман олганда, узоқ йўл юриш бироз қийин, зерикарли бўлади. Шуни ҳисобга олган ҳолда барча чоралар кўрилган. Ёз фасли, ташқарида ҳаво ҳарорати жуда иссиқ. Йўловчиларга совитиш тизими ишлаб тургани яна бир қулайлик бўляпти.

Узоқ масофа босиб ўтилиши, кўп вақт сарф этилиши инобатга олиниб поездда йўловчиларга қўшимча қулайлик яратишга эътибор қилинган. Болалар чизиши, бўяши учун суратли альбом ва рангли қаламлар, шунингдек, шахмат тарқатилгани эътиборга молик.

Ёқубжон Мелибоев(сурат), ЎзА