Тошкентда юбилей жаҳон чемпионати: 90 давлатдан спортчилар курашади
Жорий йилнинг 6–8 ноябрь кунлари пойтахтимиз Тошкентда самбо бўйича 50-жаҳон чемпионати мусобақалари ўтказилиши муносабати билан юртимизга дунё яккакурашлар оламида ном қозонган 35 га яқин спорт усталари келиши кутилмоқда.
Куни кеча Халқаро самбо федерацияси мазкур жаҳон чемпионатига доир кенгайтирилган маълумотларни тақдим этди. Жаҳоннинг энг кучли самбочиларини Тошкент спорт майдонида бирлаштирадиган юбилей жаҳон чемпионатида 90 дан ортиқ мамлакат спортчилари кураш олиб боради.
50-жаҳон чемпионати муносабати билан юртимизга самбо оламининг афсонавий спортчилари келиши кутилмоқда.
Улар орасида яккакурашлар дунёсида ғалабалари билан танилган Фёдор Емельяненко, Ислом Махачев, ҳамюртларимиз, бир неча бор жаҳон чемпионлигига эришган Бобомурод Файзиев, Феруз Агзамов, Шавкат Жўраев сингари 20 да зиёд самбочилар бор.
Самбо беллашувлари пойтахтимиздаги “Олимпия шаҳарчаси”нинг "Жамоавий спорт турлари" аренасида бўлиб ўтади.
Жаҳон чемпионати дастуридан эркаклар ва аёллар ўртасида учта йўналиш — спорт, жанговар ҳамда кўзи ожизлар учун самбо мусобақалари ўрин олган. Уч кун давомида спортчилар 33 та медаллар жамланмаси йўлида кураш олиб боради.
Жаҳон чемпионатининг умумий мукофот жамғармаси 363 минг АҚШ долларидан иборат бўлиб, олтин медаль соҳиблари 4 минг, кумуш медални қўлга киритганлар 3 минг ва бронза медалга эга чиққан самбочилар 2 минг АҚШ доллари билан тақдирланади.
Тўлқин Рўзиев,
ЎзА
