Тошкент ва Измир ўртасида илк бор тўғридан-тўғри авиақатнов йўлга қўйилади
2026 йил 1 августдан бошлаб Туркиянинг етакчи лоукостер авиакомпанияларидан бири — SunExpress Тошкент ва Измир шаҳарлари ўртасида илк бор мунтазам авиақатновларни амалга оширади.
Янги йўналиш Ўзбекистон ва Туркия ўртасидаги ҳаво қатновлари географиясини кенгайтириш, сайёҳлик ва ишбилармонлик алоқаларини янада фаоллаштириш йўлидаги муҳим қадам сифатида баҳоланмоқда.
Янги йўналиш бўйича парвозлар ҳафтасига тўрт марта 189 нафар йўловчига мўлжалланган Boeing 737-800 русумидаги ҳаво кемаларида амалга оширилади. Бу тарихда биринчи марта Тошкент ва Измир шаҳарлари ўртасида тўғридан-тўғри мунтазам авиақатнов йўлга қўйилаётганини англатади.
Мазкур йўналишнинг очилиши икки мамлакат ўртасидаги туристик алмашинувни кенгайтириш, тадбиркорлар учун янги имкониятлар яратиш ҳамда маданий-гуманитар ҳамкорликни мустаҳкамлашга хизмат қилиши кутилмоқда. Айниқса, Измир Туркиянинг йирик иқтисодий ва туристик марказларидан бири сифатида ўзбекистонлик сайёҳлар ва ишбилармонлар учун янада қулай манзилга айланади.
Янги рейслар “Uzbekistan Airports” акциядорлик жамияти учун ҳам муҳим аҳамиятга эга. Чунки SunExpress илк бор Ўзбекистон авиация бозорига кириб келмоқда ва мамлакатга мунтазам парвозларни амалга оширувчи учинчи турк авиакомпаниясига айланади. Бу эса Ўзбекистоннинг халқаро авиация бозоридаги жозибадорлиги ортиб бораётганининг яна бир амалий ифодасидир.
Компания келгуси йил бошидан Фарғона водийси аэропортларига ҳам мунтазам авиақатновларни йўлга қўйиш имкониятини кўриб чиқаётгани ҳам эътиборга молик. Агар ушбу режалар амалга ошса, мамлакат ҳудудларининг халқаро авиақатновлар тармоғи янада кенгаяди.
Ҳозирги вақтда Ўзбекистон ва Туркия ўртасида мунтазам рейслар Turkish Airlines ҳамда AJet авиакомпаниялари томонидан амалга оширилмоқда. SunExpress’нинг мазкур бозорга кириб келиши рақобат муҳитини кучайтириш, авиачипталар танловини кенгайтириш ва йўловчилар учун янада қулай шарт-шароитлар яратилишига туртки бўлиши мумкин.
Муҳайё Тошқораева,
ЎзА
