Тўқимачилик саноатига бўлган эътибор ўз самарасини кўрсатмоқда (+видео)
Президент ташрифидан сўнг...
Бухоро вилоятида фаолият юритаётган “Мергантекс” пахта-тўқимачилик кластерида пахтанинг янги навларини яратиш, уларни илмий тажрибадан ўтказиш ва сифатли уруғ тайёрлаш ишлари тизимли йўлга қўйилган. Шунингдек, корхона қишлоқ хўжалиги ерларига дронлар ёрдамида замонавий агротехник хизматлар кўрсатиб келмоқда.
Кластер қошида фаолият юритаётган “Нигора” фабрикаси “Шойигул” бренди остида маҳсулот ишлаб чиқармоқда. Корхона юртимизда яратилаётган шароитлардан самарали фойдаланган ҳолда фаолияти орқали кенг мавқега эга бўлиб бормоқда. Давлат ташрифи билан жорий йил март ойида мамлакатимизда бўлган Тожикистон Республикаси Президенти Эмомали Раҳмон ҳамда апрель ойида амалий ташриф билан келган Қозоғистон Президенти Қосим-Жомарт Тоқаев Ўзбекистон Республикаси Президенти Шавкат Мирзиёев ҳамроҳлигида мазкур кластер қошидаги “Нигора” фабрикасига ташриф буюрган эди.
– Бугунги кунда корхонамизда ишлаб чиқарилаётган маҳсулотлар қўшни давлатлар ҳамда Италия, Австрия, Буюк Британия ва Германия каби Европа мамлакатларига экспорт қилинмоқда, – дейди “Мергантекс” пахта-тўқимачилик кластери раҳбари Иброҳим Ҳамроев. – Корхонамиз 1993 йилда ташкил топган. Ўзбекистонда қишлоқ хўжалигига, шу жумладан, тўқимачилик саноатига бўлган муносабат кескин ўзгарди. 2018 йилда Президентимиз пахта-тўқимачилик кластерларини ташкил қилиш илмий концепциясини эълон қилганларида, жуда кўп юртдошларимиз қатори мен ҳам Ўзбекистон шароитида пахта етиштиришдан бошлаб тайёр маҳсулот ишлаб чиқаришгача бўлган жараённи қамраб оладиган технологик комплексни ташкил қилишнинг имконияти бўлмаса керак, деган фикрда эдим.
Мана, бугун Президентимиз томонидан қаратилган эътибор ўз самарасини бермоқда. Биз жуда кўп Европа мамлакатлари, Америка Қўшма Штатларида хизмат сафарларида бўламиз. Кўпчилик ҳамкорларимиз илк учрашувимизда Ўзбекистоннинг иқтисодий имкониятлари, жумладан, тўқимачилик соҳасидаги салоҳиятидан унчалик хабардор эмас эди. Бугун эса, Ўзбекистон маҳсулотлари ўз сифати билан дунё давлатларига кириб бормоқда.
Дарҳақиқат, Ўзбекистон ишлаб чиқариш салоҳияти, бу жараёнда инсонга бўлган муносабат, технологик жиҳатдан ҳам юқори кўрсаткичга эришди. Биз яқин-яқингача энг гўзал, бежирим кўйлакларни Италия ёки бошқа давлатлардан импорт қилганмиз. Бугун Ўзбекистон маҳсулотларини Германия ва Италиянинг брендлари, шартномалари ҳамда буюртмалари асосида ҳамкорларимизга етказмоқдамиз.
<iframe width="560" height="315" src="https://www.youtube.com/embed/_tzls35fRNc?si=TWn3i9uNZHCTLp3Y" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Абдулазиз РУСТАМОВ,
Ёқуб МЕЛИБОЕВ (видео),
ЎзА
