Томорқадан даромад, меҳнатдан барака
Бугун юртимизда аҳоли бандлигини таъминлаш, хонадонлар даромадини ошириш ва оилавий тадбиркорликни ривожлантиришда томорқачилик имкониятларидан самарали фойдаланишга алоҳида эътибор қаратилмоқда. Давлат раҳбари илгари сураётган ташаббуслар замирида ҳам ҳар бир оилани даромадли қилиш, аҳолининг ўз меҳнати орқали фаровон ҳаёт кечириши учун шароит яратишдек эзгу мақсад мужассам.
Зеро, томорқа — шунчаки ер майдони эмас, балки оила фаровонлиги, дастурхон тўкинлиги ва қўшимча даромад манбаидир. Ундан оқилона фойдаланган хонадон йилнинг турли фаслларида ўз эҳтиёжини таъминлаш баробарида бозорга ҳам сифатли маҳсулот етказиб, иқтисодий имкониятларини кенгайтириши мумкин.
Бухоро вилоятининг Қуйи Янгиобод маҳалласида яшовчи Тўлқин Раҳимов ана шу имкониятларни амалда рўёбга чиқараётган миришкор деҳқонлардан. У томорқасида иккита ихчам иссиқхона ташкил этиб, деҳқончиликни оилавий даромад манбаига айлантирган. Айни пайтда иссиқхоналардан бирида булғор қалампири етиштириб, мўл ва сифатли ҳосил олишга эришмоқда.
Унинг айтишича, бу ишга қўл уришида маҳалладаги ҳоким ёрдамчисининг кўмаги муҳим омил бўлган. Имтиёзли банк кредити асосида иссиқхона ташкил этилиб, дастлаб тупроқ унумдорлигини оширишга эътибор қаратилган.
— Маҳалламиздаги ҳоким ёрдамчисининг кўмагида имтиёзли банк кредити асосида иссиқхона ташкил қилдик. Аввало, ернинг унумдорлигини ошириш мақсадида Калифорния чувалчанглари ёрдамида биогумус тайёрлаб, тупроққа солдим. Ер кўчат экишга тайёр бўлгач, булғор қалампирининг «Ведрана» навини экдик. Бу навнинг турли касалликларга чидамлилиги эътиборимизни тортди, — дейди Тўлқин Раҳимов.

Деҳқоннинг танлови бежиз эмас. “Ведрана” нави нисбатан эртапишарлиги, ҳосилдорлиги ва турли иқлим шароитларига мослашувчанлиги билан ажралиб туради. Кўчатлар экилганидан кейин 60–65 кун ичида ҳосилга киради. Қалампир меваларининг вазни эса 150–250 граммгача етиши мумкин. Бу хусусиятлар иссиқхона шароитида қисқа муддатда бозорбоп маҳсулот етиштириш имконини беради.
Бу жараёнда эътиборга молик жиҳат шундаки, Тўлқин Раҳимов фақат кўчат экиш ва ҳосил олиш билан чекланмаяпти. У тупроқ унумдорлигини табиий усулда ошириш, иссиқхона имкониятларидан унумли фойдаланиш орқали деҳқончиликда самарадорликка эришмоқда. Бу эса томорқачиликда замонавий агротехнологиялар ва илғор тажрибаларни қўллаш қанчалик муҳим эканини кўрсатади.
Аслида, бундай мисоллар давлатимиз томонидан аҳоли томорқаларини даромад манбаига айлантиришга қаратилаётган эътиборнинг ҳаётий ифодасидир. Маҳаллаларда ҳоким ёрдамчилари кўмагида имтиёзли кредитлар ажратилиши, хонадонларда ихчам иссиқхоналар ташкил этилиши, аҳолига зарур маслаҳат ва амалий ёрдам кўрсатилиши ташаббускор инсонлар учун янги имкониятлар эшигини очмоқда.

Энг муҳими, бу имкониятлардан самарали фойдаланиш ҳар бир хонадоннинг ўз қўлида. Тўлқин Раҳимовнинг тажрибаси ҳам катта ер майдони ёки улкан сармоясиз, мавжуд ресурсларни тўғри йўналтириш, меҳнат ва изланиш орқали ҳам муносиб даромад топиш мумкинлигини кўрсатади.
Зеро, ҳар бир қарич ердан унумли фойдаланиш — нафақат бир оиланинг иқтисодий барқарорлиги, балки ҳудудда озиқ-овқат маҳсулотлари етиштириш ҳажмини ошириш, аҳоли бандлигини таъминлаш ва бозорлар тўкинлигини мустаҳкамлашга ҳам хизмат қилади. Томорқадаги бугунги меҳнат эртанги фаровонликка қўйилган мустаҳкам пойдевордир.
Зариф Комилов, ЎзА мухбири