30 ноябрь куни Тошкент давлат шарқшунослик университети ва Теҳрон университети ўртасида англашув меморандуми имзоланди. Ушбу университет халқаро рейтингларда дунёдаги нуфузли 600 талик қаторидан жой олган.

Ҳужжат Эрон Ислом Республикасининг Ўзбекистондаги Фавқулодда ва мухтор элчиси Ҳамид Найрободийнинг Тошкент давлат шарқшунослик университетига ташрифи чоғида имзоланди.  

Элчи Президент Шавкат Мирзиёев олиб бораётган самарали ташқи сиёсат туфайли Ўзбекистон хорижий давлатлар билан алоқаларни мустаҳкамлагани, жумладан, Эрон Ислом Республикаси билан ҳам турли соҳалардаги ҳамкорлик жадал ривожланиб бораётганини таъкидлади. Коронавирус пандемияси даврида мамлакатларимиз ўртасидаги алоқалар парламент, вазирлик ва идоралар доирасида онлайн тарзда муваффақиятли давом этаётгани ҳамкорликдаги истиқболли режаларни ўз вақтида амалга оширишга хизмат қилиши қайд этилди.    

Учрашувда Эрон-афғон филологияси кафедраси профессори Аҳмаджон Қуронбековнинг “Навоий Хамсасидан маънолар хазиналари” номли монографияси тақдимоти ўтказилди. Мазкур монография Теҳрон университети профессори Вакилий Фард муҳаррирлигида жорий йили Эронда нашр қилинди.

Ҳамид Найрободий кафедра фаолияти, унинг қошидаги кутубхона, мавжуд адабиётлар билан танишди. Кутубхона фондига Эрон элчихонаси томонидан эроншунослик соҳасига оид 80 номдаги адабиётлар тақдим этилди.

Элчи университетда эроншуносликка берилаётган эътибор учун миннатдорлик билдирди. Университет ва Эрон элчихонаси университетда Эроншунослик марказини очиш масаласини яқин келажакда кўриб чиқишга келишилди.

Аввал хабар қилинганидек, шу йил 31 октябрда Тошкент давлат шарқшунослик университети Аллома Таботабоий университети билан ҳамкорлик шартномаси имзолаб, Эрон олий таълим муассасалари билан муносабатларига тамал тоши қўйилган эди.  

Ўтган даврда университет билан қатор тадбирлар ўтказишга эришилди. Эроншунос профессор Аҳмаджон Қуронбеков Аллома Таботабоий университети ташкил этган “Халқаро форс тили ўқитувчилари ижодхонаси” номли халқаро тадбирда, катта ўқитувчи Нозима Ҳодиева “Дунёда тинчликни таъминлашда аёллар ва имкониятлар” мавзуидаги халқаро тадбирда маъруза билан иштирок этди.  

ТДШУда ўтказилган “Жаҳон туркологиясининг буюк обидаси “Қутадғу билиг” ва уни ўрганишнинг долзарб масалалари” мавзуидаги халқаро конференцияда мазкур университетнинг Туркология кафедраси мудири, профессор  Меҳди Резаи ўз маърузаси билан иштирок этди.

 

Элёр Маҳмудов,

ТДШУ халқаро ҳамкорлик бўйича проректори