Тadbircore.uz – турли банкларнинг таклифларини бир жойда жамлаган платформа
Бир банкдан иккинчисига бориб, ҳар сафар қайтадан ҳужжат топширишдан чарчаган тадбиркорлар учун яхши янгилик бор.
Марказий банкнинг tadbircore.uz платформаси бир ойдан бери синов режимида ишлаяпти. Ғоя жуда қулай: битта жойда ариза топширасиз, турли банкларнинг таклифларини кўрасиз ва ўзингизга мосини танлайсиз. Яъни тадбиркорлар учун ҳақиқий one-stop shop.
Натижалар ҳам ёмон эмас: бир ойда қарийб 1,5 мингта ариза келиб тушган ва 415 та кредит ажратилган. Кредит олганларнинг 46 фоизи микробизнес, 21 фоизи эса якка тартибдаги тадбиркорлар. Яна бир қизиқ рақам: 41 нафар тадбиркор илгари мижоз бўлмаган банкдан кредит олган. Демак, энди фақат тадбиркор банк изламайди – банклар ҳам яхши мижоз учун рақобатлашишни бошлаяпти.
Платформа ҳали синов босқичида, шунинг учун айнан ҳозир кириб кўриш қизиқ. tadbircore.uz орқали ариза юборинг, жараённи синаб кўринг ва фикрингизни қолдиринг. Фақат олдиндан E-IMZO тайёрлаб қўйинг – ариза топширишда керак бўлади. Қулай ишласа – айтинг, қаердадир қийналсангиз – уни ҳам ёзинг. Платформа айнан реал фойдаланувчилар тажрибаси асосида яхшиланмоқда.
ЎзА
