Шу кунларда Греция пойтахти Афина шаҳрида синхрон сузиш бўйича ёшлар ўртасидаги жаҳон чемпионати баҳслари давом этмоқда.

Кеча чемпионатнинг навбатдаги кунида Ўзбекистон терма жамоаси аъзоси Дарья Кочнева эркин яккалик дастурда муваффақиятга эришди.

Маҳоратли спортчимиз дунёнинг энг кучли спортчилари билан кечган мусобақада мамлакатимиз синхрон сузиш спорти тарихида илк бор ёшлар ўртасидаги жаҳон чемпионати финал йўлланмасини қўлга киритди.

Мажбурий дастурда ишончли ҳаракатланган Кочнева 78,3000 очко тўплаб, финалчилар қаторидан жой олди. Аввалроқ, эркин яккахон чиқишнинг дастлабки босқичида Дарья 200,9649 очко жамғарган ҳолда ўзининг юқори тайёргарлигини намойиш этганди.

Кеча кечки пайти чемпионат финалида иштирок этган Дарья Кочнева 35 та давлат вакиллари орасида 284.7366 очко жамғариб, 12-ўринни эгаллади. Ушбу дастурда мустақил иштирокчи сифатида қатнашган россиялик Александра Пищикова 391.5284 очко билан 1-ўринни, туркиялик Селин Хурмерик (379.4196) 2-ўринни, АҚШ вакили Жаклин Жуге(373.3998) 3-ўринни эгаллади.

Греция баҳсларида эркин чиқиш дастурининг жуфтлик мусобақаларида иштирок этган терма жамоамиз аъзолари Елизавета Касаткина ва Аделина Цурикова саралаш мусобақаларида 149.0680 очкони қўлга киритиб, 34 та давлат вакиллари орасида 20-поғонани банд этишди.

Ушбу дастурда совринли ўринлар Туркия, Греция ва Швеция жамоаларига насиб этди.

Т. Рўзиев, ЎзА