Бухоро вилояти Когон шаҳридаги дастрўмолча ишлаб чиқаришга ихтисослашган “Анмира” кичик корхонаси пандемия даврида иқтисодий қийналгани, керакли ускуналари етарли эмаслиги ҳамда ишчи кучи камлиги сабабли фаолиятини тўхтатган эди.

Когон шаҳар 4-сектор раҳбари яқинда ушбу тадбиркорлик субъекти билан қизиқиб, биринчи навбатда, тадбиркорга фаолиятини тиклаш учун банкдан имтиёзли кредит олишга кўмаклашди. Керакли маблағ топилишига ҳамоҳанг ишлаб чиқариш учун бино ва ускуналар масаласи ҳам ҳал этилди. Сектор раҳбари ҳудуддаги ишсиз ёшлар ва аҳоли билан учрашувларда уларни ушбу янги корхона фаолияти билан таништириши натижасида корхонанинг доимий ишчилари ҳам шакллантирилди.

Ҳозирда ушбу корхонада “Ёшлар” ва “Аёллар” дафтарларига киритилган жами 15 нафар когонлик турли ёшдаги фуқаролар икки сменада ишламоқда. Иши юришиб кетган тадбиркор маҳсулотларини эндиликда ички бозордан ташқари, ташқи бозорда ҳам сотишни режалаштирмоқда. Бу ўз-ўзидан, корхонанинг маҳсулотларига талаб ортиб бораётганидан дарак беради.

Вилоят давлат солиқ бошқармаси матбуот хизматининг хабарига кўра, айни пайтда Когон шаҳрида фаолият кўрсатаётган жами 680 та хўжалик юритувчи субъектларнинг барқарор фаолият юритишларини таъминлаш учун уларнинг ҳар-бирига давлат солиқ инспекциясидан масъул ходим бириктирилган. 

Жорий йилнинг ўтган даврида давлат солиқ хизмати ходимлари томонидан ҳудуддаги 20 дан ортиқ корхоналарга кредит олишига кўмаклашилган. Тугатилиш жараёнида турган 6 та корхонанинг фаолияти сектор раҳбари аралашуви билан қайта тикланди. Уларга керакли бўлган шароитлар яратилди. Пировардида қўшимча ишчи ўринлари яратилишига эришилмоқда.

Зариф Комилов, ЎзА