Самбо: Жаҳон чемпионатининг илк кунида 6 та медаль қўлга киритилди
Самбо бўйича катталар ўртасида ўтаётган 50-жаҳон чемпионатининг ортда қолган дастлабки кунги беллашувларида 9 та вазн тоифасида ғолиб ва совриндорлар аниқланди.
100 дан зиёд мамлакатнинг 700 нафарга яқин спортчилари қатнашаётган тарихий жаҳон чемпионатининг илк кунида спорт самбосида эркаклар -58, -79 килограммда, аёллар -50 килограммда, жанговар самбода эркаклар -64, -88, аёллар +80 кило оғирликда, кўзи ожиз эркак спортчилар -64, -79, -98 килограммда, қизлар -50 ва -59 килограммда куч синашди.
[gallery-32389]
Шиддатли кечган курашлар натижасига кўра, Ўзбекистон терма жамоаси аъзолари 2 тадан олтин, кумуш ва бронза, жами 6 та совринли ўринни қўлга киритди.
Хусусан, спорт самбоси баҳсларида ҳамюртларимиз совринли ўринлардан мосуво қолган бўлса, жанговар самбо курашларида терма жамоамиз аъзоларидан Мавлуда Абдуллаева +88 килограмм вазн тоифасининг саралаш мусобақаларида барча рақибларини мағлуб этди. Финалда у қирғизистонлик Нурила Ассан кизидан устунликка эришиб, 50-жаҳон чемпионатининг олтин медалига сазовор бўлди.
Шунингдек, кўзи ожиз спортчилар ўртасида -98 килода ватанимиз шарафини ҳимоя қилган Ўлмас Раиймов рақибларини доғда қолдирган ҳолда чемпионлик шоҳсупасидан жой олди.
Кўзи ожиз спортчилар ўртасида Исоқ Абдураҳмонов -64 килограммда, Чарос Ортиқова -50 килода кумуш медалга эгалик қилган бўлса, жанговар самбонинг -64 килосида ҳамюртимиз Баҳодир Боқиев, кўзи ожиз қизлар баҳсида Насиба Бобоқулова -59 кило оғирликда бронза медалларига сазовор бўлди.
Бугун, 7 ноябрь куни жаҳон чемпионатининг иккинчи кунги беллашувларида самбочилар 12 та вазн тоифасида куч синашади.
Тўлқин Рўзиев, Алимурод Мамадаминов(сурат), ЎзА
