Бирлашган Миллатлар Ташкилотининг денгизга чиқиш имкони бўлмаган мамлакатлар бўйича учинчи ривожланиш конференциясида энг кам ривожланган давлатлар, денгизга чиқиш имкони бўлмаган ривожланаётган мамлакатлар ва кичик оролларнинг ривожланаётган давлатлари бўйича Олий вакили Рабоб Фотима нутқ сўзлаб, давлатлар тақдирини география олдиндан белгиламаслиги кераклигини таъкидлади.
“Turkmenistaninfo” ёзишича, Фотима хоним тизимли чекловга қарамай, улкан салоҳият ва ресурсга эга бундай мамлакатлар тараққиёт сари дадил интилаётганини таъкидлаган. Тўсиқларни енгиб ўтиш учун ҳамкорлик, рақамли интеграция, иқтисодий трансформация муҳимлигига урғу берган. Рабоб Фотима 320 дан зиёд лойиҳани ўз ичига олган, кейинги ўн йиллик учун стратегик режа ҳисобланган Аваза Ҳаракат Кун тартиби ишга туширилганини эълон қилди. Дастурда транзит эркинлиги, иқлим ўзгаришига чидамлилик ва хусусий секторни фаоллаштиришга алоҳида эътибор қаратилган.
Мулозим сўзини якунларкан, халқаро ҳамжамиятни муайян масалаларда қатъий чоралар кўришга чақирди:
– Конференция мезони сўз билан эмас, балки ҳаётий ўзгаришлар – йўллар, савдо йўлаклари ва мамлакатларимиз муносабатлари мустаҳкамланиши билан ўлчанади.
Муҳаррама Пирматова, ЎзА