Путиннинг рейтинги кетма-кет еттинчи ҳафта пасаймоқда

Россияликларнинг 24,1 фоизи айни пайт мамлакат етакчиси Владимир Путинга ишонмаяпти. Сўралганларнинг 23,3 фоизи эса унинг президентлик фаолиятидан норози.

Бутунроссия жамоатчилик фикрини ўрганиш маркази (ВЦИОМ) томонидан эълон қилинган сўнгги маълумот кўрсатдики, бу Россия – Украина уруши бошлангандан бери президентга ишончсизлик бўйича қайд этилган энг баланд кўрсаткич.

Ўтган ҳафта билан таққосланганда, Путиннинг рейтинги 1,1 фоиз тушиб, 65,6 фоизни ташкил этди. РФ раҳбари фаолиятига ишонч ҳам 1 банд пасайиб, 71 фоизни кўрсатди.

Рейтинг пастлаши кетма-кет етти ҳафта давомида кузатилган. Путин маъмурияти билан ишлайдиган сиёсий стратег фикрича, ҳукумат рейтинги тушишига “Телеграм” ва мобил интернетга чеклов, нарх кўтарилиши ва россияликлар урушдан чарчагани сабаб бўлган.

С.Раҳимов, ЎзА