Путин қатнашадиган форум ҳудуди нишонга олинди
Россиянинг Санкт-Петербург шаҳрида навбатдаги халқаро иқтисодий форум иш бошлаган куннинг ўзида шаҳар дронлар ҳужумига учради. Эрталаб осмонда тутун кўтарилгани кузатилди, айрим объектларда эса авария-қутқарув хизматлари иш бошлади. Форумда Россия президенти Владимир Путин ҳам иштирок этиши кутилаётган эди.
Украина томони ҳужум давомида Санкт-Петербург нефть терминали ҳамда Кронштадтдаги ҳарбий объектлар нишонга олинганини маълум қилди.
Киевнинг таъкидлашича, Тамбов вилоятида қурол-яроғ ишлаб чиқариш билан боғлиқ корхона ҳам зарбалар остида қолган. Ҳужумлар Украина чегарасидан қарийб 1100 километр узоқликда амалга оширилган. Бу ҳақда “Euronews” нашри ёзди.
Россия расмийлари бир неча киши жароҳат олганини тасдиқлади. Айни пайтда ҳалок бўлганлар ҳақида маълумот берилмаган. Ҳодиса оқибатларини бартараф этиш ишлари давом этмоқда.
Шу билан бир вақтда Донецк вилоятининг Россия назоратидаги қисмида йўловчи автобусига дрон зарбаси берилган. Дастлабки маълумотларга кўра, етти киши ҳалок бўлган, яна ўн бир киши турли даражада жароҳат олган. Автобус Москвадан Қрим яриморолига қараб ҳаракатланаётган бўлган.
Бу воқеалар Россиянинг бир кун аввал Украина бўйлаб амалга оширган йирик ракета ва дрон ҳужумларидан кейин содир бўлди. Киев ва бошқа шаҳарлар нишонга олинган ўша ҳужумларда камида 23 киши ҳалок бўлган, 138 нафар одам жароҳатланган эди.
Владимир Зеленский Москва янги ҳужумларга тайёргарлик кўраётганини айтди. У Ғарб давлатларини Россияга қарши санкцияларни кучайтиришга чақириб, ҳаво мудофааси тизимлари ва “Patriot” ракеталари етказиб беришни тезлаштириш зарурлигини таъкидлади.
Украина расмийларига кўра, Россия бир кечада 70 дан ортиқ ракета ва 650 та дрон учирган. Ҳаво ҳужумларининг катта қисми қайтарилган бўлса-да, баллистик ракеталар ҳамон энг катта хавф бўлиб қолмоқда.
Мусулмон Зиё, ЎзА
