"Президент Олимпиадаси": қиличбозлик мусобақаларида навбатдаги ғолиблар аниқланди
Чирчиқ шаҳридаги Ўзбекистон давлат жисмоний тарбия ва спорт университетининг енгил атлетика манежида қиличбозлик бўйича "Президент Олимпиадаси"нинг учинчи кун мусобақалари ўтказилди. Унда 14 ёшгача бўлган ўсмир спортчилар сабля йўналишида ғолиблик учун баҳс олиб борди.
Қизлар ўртасидаги яккалик баҳсларида 36 нафар спортчи иштирок этди. Якуний натижаларга кўра, София Макарова (Тошкент) биринчи ўринни эгаллади. Заманой Жиенгалиева (Қорақалпоғистон Республикаси) кумуш медалга сазовор бўлди. Перизат Мауленбергенова (НОПСТТМ) ва Сабина Абдунабиева (Тошкент) учинчи ўринни бўлишди.
Ўғил болалар ўртасидаги жамоавий мусобақада эса саккизта ҳудуд жамоаси иштирок этди. Унда Қорақалпоғистон Республикаси жамоаси шоҳсупанинг энг юқори поғонасидан жой олди. Тошкент жамоаси иккинчи, Жиззах ва Наманган вилоятлари вакиллари учинчи ўринни эгаллади.
Шу тариқа, Президент Олимпиадасининг навбатдаги куни ёш қиличбозларнинг маҳорат ва тайёргарлик даражасини намоён этиш билан бирга, ҳудудларда ушбу спорт тури ривожланаётганини ҳам кўрсатди.
Жавоҳир Тошхўжаев, ЎзА
