АОКАда Ихтисослаштирилган таълим муассасалари агентлиги раҳбарияти иштирокида матбуот анжумани бўлиб ўтди.
Қайд этилишича, Агентлик тизимидаги Президент, ижод, спорт ва ихтисослаштирилган мактабларга ҳужжатлар қабули жорий йилнинг 1–20 июнь кунлари, кириш имтиҳонлари эса июль ойида ўтказилади.
2025–2026 ўқув йили учун қабул квоталари қуйидагича бўлади:
– Президент мактабларининг 5-синфига белгиланган йиллик қабул квотаси доирасида иккита синфга бир хил 12 нафардан 24 нафар жами 336 нафар;
– ижод мактабларининг 7-синфига 440 нафар;
– Баҳодир Жалолов номидаги боксга ихтисослаштирилган спорт мактабининг 5-синфига 24 нафар;
– Оксана Чусовитина номидагигимнастикага ихтисослаштирилган спорт мактабининг 1-синфига 24 нафар;
– ихтисослаштирилган мактабларнинг аниқ ва табиий фанлар йўналишларига тегишлилиги бўйича 5- ва 7-синфларга 8 200 нафар.
Заруратга кўра мазкур қабул квоталарига Агентлик томонидан ўзгартиришлар киритилиши мумкин.
Агентлик тизимидаги мактабларга ўқувчиларнинг ота-оналари ёки қонуний вакиллари томонидан ҳужжатлар онлайн шаклда:
- my.gov.uz ягона интерактив давлат хизматлари портали;
- Агентликнинг ariza.piima.uz расмий веб-сайти;
- мобил илова орқали қабул қилинади.
Ўқувчилар фақат ўзи таълим олаётган мактаб жойлашган ҳудуддаги Президент ва ихтисослаштирилган мактабларга ҳужжат топширишлари мумкин.
Ўқувчиларга Президент ҳамда ихтисослаштирилган мактабларга ҳужжат топшириш жараёнида ихтиёрий равишда ўз ҳудудидаги ихтисослаштирилган мактаблардан бирини қўшимча (алтернатив) танлаш имконияти берилади.
Шунингдек, рўйхати Агентлик томонидан тасдиқланадиган халқаро, минтақавий ёки асосий фан олимпиадаларининг учинчи (вилоят) босқичи ёки унга тенглаштирилган босқичида математика, информатика, физика, кимё, биология фанларидан ғолиб ва совриндор (1, 2, 3-ўринлар) бўлган умумий ўрта, ўрта махсус ва бошланғич профессионал таълим ташкилотлари ўқувчилари ўзи таълим оладиган ҳудуддаги ихтисослаштирилган мактабларга қабул квотаси доирасида кириш имтиҳонисиз қабул қилинади.
Ўтган ўқув йилида Қорақалпоғистон Республикаси, Андижон, Самарқанд вилоятларида Муҳаммад ал-Хоразмий номидаги ихтисослаштирилган мактаб филиаллари ташкил этилган бўлса, 2025-2026 ўқув йилида Бухоро, Фарғона, Жиззах, Хоразм вилоятларида ташкил этилади.
Қолаверса, Тошкент вилоятининг Чиноз туманида Абу Али ибн Сино номидаги ихтисослаштирилган мактаб филиали ташкил этилади.
Ушбу мактабларга 2025-2026ўқув йили учун фақат шу ҳудуднинг ўқувчилари ҳужжат топширишади. Бу каби мактаблар келгуси йилларда босқичма-босқич қолган барча ҳудудларда ташкил этилиши режалаштирилган.
Шунингдек, 10 та, жумладан:
- Андижон вилоятининг Булоқбоши, Жалақудуқ, Пахтаобод;
- Қашқадарё вилоятининг Ғузор;
- Тошкент вилоятининг Юқори Чирчиқ;
- Хоразм вилоятининг Гурлан, Урганч, Боғот туманлари;
- Фарғона вилоятининг Фарғона ва Қувасой шаҳарларида ихтисослаштирилган мактаблар ташкил этилмоқда.
Жорий йилги қабул жараёнларида 4-синфни тамомлаган ўқувчилар бир вақтнинг ўзида ҳудудидаги Президент мактаби, ихтисослаштирилган мактабнинг аниқ фанлар йўналиши ва мавжуд бўлган тақдирда ўз ҳудудидаги ёки Тошкент шаҳридаги Муҳаммад ал-Хоразмий номидаги ихтисослаштирилган мактабнинг 5-синфига; 6-синфни тамомлаган ўқувчилар ҳудудидаги ихтисослаштирилган мактабнинг табиий фанлар йўналишига ва Абу Али ибн Сино номидаги ихтисослаштирилган мактабнинг 7-синфига ҳам алоҳида ҳужжат топширишлари мумкин.
Президент мактабларига умумий ўрта таълим муассасаларининг 4-синф битирувчилари орасидан қобилиятли ва иқтидорли (математика ва табиатшунослик фанларидан ўқув йилини аъло баҳоларга тамомлаган) ўқувчиларнинг ҳужжатлари қабул қилинади.
Ижод, спорт, ихтисослаштирилган мактабларга ҳужжат топшириш жараёнида баҳолар табелида аъло баҳоларнинг бўлиши талаб этилмайди.
Президент мактабларининг кириш имтиҳонлари 2 босқичда Англиянинг Cambridge халқаро ташкилоти билан ҳамкорликда ташкил этилади.
Биринчи босқич — математика фанидан (30 та) тест шаклида ўтказилади. Биринчи босқич натижалари имтиҳон топширилган кундан кейин 20 кун ичида эълон қилинади.
Биринчи босқич натижасига кўра қабул квотасида белгиланган ҳар бир ўринга 20 нафардан, ҳар бир мактабга жами 480 нафар энг юқори балл тўплаган талабгорлар иккинчи босқичда иштирок этишларига рухсат этилади.
Иккинчи босқич — математика фанидан танқидий фикрлаш ва муаммони ечиш бўйича жами 40 та, инглиз тили фанидан грамматика ва матн билан ишлаш бўйича 40 та тест шаклида ўтказилади. Иккинчи босқич натижалари имтиҳон топширилган кундан кейин 30 кун ичида Агентлик ва Cambridge халқаро ташкилотининг расмий веб-сайтларида эълон қилинади.
Ижод мактабларининг кириш имтиҳонлари эса давлат тилида (Қорақалпоғистон Республикасида қорақалпоқ тилида), Исъҳоқхон Ибрат номидаги ижод мактабида чет тилида 3 босқичда ўтказилади:
биринчи босқич — ижодий матн яратиш;
иккинчи босқич — ижодий суҳбат;
учинчи босқич — она-тили ва адабиёти фанидан 20 та, инглиз тилидан 15 та ҳамда интеллектуал қобилият даражасини аниқлаш бўйича 15 та жами 50 та тест синовлари шаклида ўтказилади.
Ихтисослаштирилган мактабларнинг кириш имтиҳонлари Сингапурнинг Marshall Cavendish Education халқаро ташкилоти билан ҳамкорликда қуйидаги йўналишлар бўйича бир босқичда амалга оширилади:
аниқ фанлар йўналиши бўйича математика фанидан 30 та ва инглиз тили фанидан 15 та жами 45 та тест;
табиий фанлар йўналиши бўйича science фанидан 30 та ва инглиз тили фанидан 15 та жами 45 та тест топшириқлари асосида ўтказилади.
Имтиҳон натижалари ҳамкор ташкилот билан биргаликда таҳлил қилинади ва имтиҳон топширилган кундан кейин 20 кун ичида Агентлик ҳамда Marshall Cavendish Education халқаро ташкилотининг расмий веб-сайтларида эълон қилинади.
Муҳайё Тошқораева,
ЎзА