Пойтахтимиздаги «Premier Hall» кинотеатри жорий йилда бўлиб ўтадиган "Ипак йўли дурдонаси" Тошкент халқаро кинофестивалида муҳим манзиллардан бири бўлиши кўзда тутилмоқда.
Шу сабабли, Кинематография агентлиги ижарачилар билан келишган ҳолда бинонинг ташқи қиёфасини янгилашга қарор қилди.
Таъмирлаш ишлари пайтида бинонинг юзасида эски панно топилди. Шундан сўнг Кинематография агентлиги томонидан экспертлар таклиф қилиниб, ушбу топилма ўрганилди.
Панно Альфред Мазитовнинг қаламига мансуб "Кокилли қиз" мозаикаси эканлигини экспертлар тасдиқлади. Рассомлар уюшмаси раиси Акмал Нур ва экспертлар паннони реставрация қилиш имкони мавжудлигини маълум қилди.
Шундан келиб чиқиб, ушбу фрескани сақлаб қолиб, бинонинг янги дизайнини айнан "Кокилли қиз"дан келиб чиқиб яратиш мақсадга мувофиқ, деган хулосага келинди. Ҳозирда бинонинг ижарачилари ва қурувчилар билан қайта музокалар ўтказиб, уларга янги дизайн бўйича кўрсатмалар берилди.
Айтиб ўтиш жоизки, бинонинг дизайни умуман бошқача бўлиши ва топилган панно ўрнида фильмлар анонслари учун экран ўрнатилиши режалаштирилган эди. Эндиликда айнан "Кокилли қиз" бинонинг янги дизайнини белгилаб беради.
Шунингдек, ушбу ўзгаришлардан сўнг бинонинг ҳозирги “Premier Hall” номи қанчалик мос бўлиши бўйича саволлар туғилмоқда. Шу сабабдан шаҳар аҳолисидан таклифларни кутиб қоламиз. Ўтган ҳафта давомида ижтимоий тармоқларда "Кокилли қиз" панноси атрофида бўлган фикрларни кузатдик. Санъат асарига бефарқ бўлмаган, уни сақлаб қолиш бўйича мурожаат йўллаган барчага миннатдорчилик билдирамиз.
Кинематография агентлиги Ахборот хизмати