Халқаро шахмат федерацияси томонидан ортда қолган нуфузли мусобақалар сарҳисобига кўра, эълон қилиб бориладиган “FIDE Circuit-2025”нинг янгиланган рейтингида ўзбекистонлик 4 нафар шахматчининг номи қайд этилди.
Мазкур рейтингда “Grand Chess Tour” тизимидаги “Superbet Chess Classic Romania-2025” халқаро турнирида ғолибликка эришган ҳиндистонлик Рамешбабу Прагнанандха 68.40 очко билан “FIDE Circuit-2025” жадвалида пешқадамликка эришди.
Иккинчи ўринни хитойлик Динг Лирен 40.64 очко билан банд этган вазиятда яқинда Бирлашган Араб Амирликларида Осиё чемпионлигини қўлга киритган эронлик Данешвар Бардия 33.39 очко билан 3-поғонадан жой олди.
Ўзбекистон терма жамоаси аъзоларидан Нодирбек Абдусатторов 18.42 очко билан “FIDE Circuit-2025” рўйхатида 14-ўринни, Шамсиддин Воҳидов 17.03 очко билан 18-ўринни, Нодирбек Ёқуббоев 14.50 очко билан 21-ўринни ҳамда Муҳиддин Мадаминов 14.22 очко билан 22-қаторни эгаллади.
“FIDE Circuit-2025” рейтингида энг кўп очко тўплаган шахматчи жаҳон чемпионлиги учун номзодлар турнири йўлланмасига эга чиқади.
Эслатиб ўтамиз, ўтган йилнинг 5 март ҳолатида Нодирбек Абдусатторов ушбу рейтингда етакчилик қилган эди.
Т.Рўзиев, ЎзА