Халқаро шахмат федерацияси тизимидаги FIDE Circuit рейтингининг янгиланган рўйхатида Ўзбекистон терма жамоаси аъзолари етакчиликка эришди.
Яқинда Нидерландияда ўтган “Tata Steel Masters-2026” турнири якунларига кўра, ҳамюртимиз Нодирбек Абдусатторов “Мастерс” гуруҳида ғолибликка эришиши ортидан 25.78 очко жамғариб, умумий жадвалда 1-ўринга кўтарилишга муваффақ бўлди.
Мазкур турнир давомидаги 13 та турнинг биронтасида мағлубиятга учрамаган ҳолда 2-ўринни эгаллаган Жавоҳир Синдоров 18,75 очко жамғариб, рейтингда 2-ўринни банд этди.
Айтиш лозимки, ушбу рейтинг ФИДЕнинг йиллик календарь тизим жараёнида ўтказиб келинадиган турнирлар ва чемпионатларда шахматчиларнинг қайд этган натижалари асосида доимо янгиланиб туради.
Шу жиҳатдан, эндигина бошланган янги шахмат мавсуми остонасида ўзбекистонлик гроссмейстерларнинг ушбу рейтингда етакчиликни қўлга киритгани шонли ғалабаларга руҳий қувват бағишлаши билан ўзига хос аҳамият касб этади.
Т.Рўзиев, ЎзА