Ўзбекистон Президентининг “Опера ва балет санъатини янада ривожлантириш чора-тадбирлари тўғрисида”ги қарорига асосан миллий опера ва балет санъатини жаҳон миқёсида кенг тарғиб этиш, маданий алоқаларни янада ривожлантириш мақсадида Алишер Навоий номидаги Ўзбекистон давлат академик катта театри жамоасининг хорижий давлатларга гастрол сафарларини ташкил этиш белгиланган.
Айни кунларда Туркиянинг Истанбул ва Бурса шаҳарларида машҳур композитор, пианиночи ва дирижёр Игор Стравинскийнинг “Муқаддас баҳор” балети ҳамда катта театрнинг етакчи опера ва балет солистлари иштирокида катта гала-концерт намойиш этилмоқда.
Ўзбекистон давлат академик катта театри 2022-2026 йилларга мўлжалланган режага биноан, 2022 йилдан буён хорижий форумларда иштирок этиб келяпти. Жумладан, 2022 йилда Жанубий Кореянинг Тегу, Пусан, Кочанг, Пхёнтхек шаҳарлари, Озарбайжоннинг Боку шаҳри, шунингдек, 2023 йилда эса Хитой Халқ Республикасининг Пекин шаҳри, Россия, Қозоғистон, Беларусь ҳамда 2024 йил 13-14 март кунлари Қирғиз Республикасининг Бишкек шаҳрида хорижий гастрол сафарлари амалга оширилди.
Айни кунларда хорижий гастрол сафари Туркияда бўлиб ўтмоқда. Нуфузли анжуманда Алишер Навоий номидаги Ўзбекистон давлат академик катта театрининг 130 нафарга яқин ходими иштирок этаётгани қувонарли.
3 октябрь куни Истанбулнинг Мустафа Камол Отатурк маданият марказида йирик тадбир ташкил этилди, 5 октябрь куни Бурса шаҳридаги Маданият марказида машҳур композитор, пианиночи ва дирижёр Игор Стравинскийнинг “Муқаддас баҳор” балети ҳамда театрнинг етакчи опера ва балет солистлари иштирокида катта гала-концерт намойиши бўлиб ўтади.
Жорий йил 13 апрелдан 10 ноябрга қадар Туркиянинг 16 ҳудудида бўлиб ўтаётган “Türkiye Kültür Yolu Festivali” халқаро санъат фестивалида дунёнинг барча нуқталаридаги маданият ва санъат соҳаси вакиллари бир нуқтада жам бўлишган. Бу каби нуфузли фестивалда қатнашишдан мақсад ўзбек санъати ва маданиятини кенг жамоатчиликка намойиш этишдир.
– Мазкур фестивалда иштирок этиш учун аризалар икки йил олдиндан топширилиб, бир ярим йил олдин тадбир дастури тасдиқланади, – дейди Ўзбекистон халқ артисти, Алишер Навоий номидаги Ўзбекистон давлат академик катта театри директори Рамиз Усмонов. – Шунга қарамай, биз икки ой аввал театрнинг гастрол сафари доирасидаги намойишларини фестиваль дастурига киритишга эришдик. Жаҳонга машҳур театрлардан Россия халқ артисти Валерий Гергиев бошчилигида Мариинский театри, Германиянинг “Deuche Opera Berlin” театри, Англиянинг “Royal Opera Hous” театрлари қаторида айнан бизнинг театр қатнашишининг ўзи Ўзбекистон ва ўзбек санъати учун жуда катта фахр ҳисобланади.
Қайд этиш керак, ташриф давомида 2025 йилда Туркияда бўлиб ўтадиган жаҳонга машҳур Халқаро Аспендос опера ва балет фестивалида иштирок этиш бўйича келишувга эришилди.
<iframe width="650" height="420" src="https://www.youtube.com/embed/rMUrdSKbV-0" title="Oʻzbekiston davlat akademik katta teatri jamoasi xalqaro sanʼat festivalida ishtirok etmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Беҳруз ХУДОЙБЕРДИЕВ, ЎзА