Россия Федерациясининг Якутск шаҳрида давом этаётган “Осиё болалари” ўйинларининг учинчи кунги мусобақаларида ўзбекистонлик спортчилар таэквондо, мини-футбол баҳсларида муваффақиятга эришди.

Сузиш, маст-рестлинг каби спорт турларида эса ҳамюртларимизга омад кулиб боқмади.

Шундай бўлса-да ортда қолган самбо ва таэквондо мусобақаларидаги муваффақият туфайли ҳамюртларимиз 6 та олтин, 5 та кумуш ва 7 та бронза медали ҳисобига умумжамоада етакчиликни давом эттирмоқда.

Учинчи кунги ўйинлар дастуридан ўрин олган мини-футбол баҳслари қизиқарлилиги билан кўплаб мухлислар диққат-марказида бўлди.

Ўзбекистон мини-футбол терма жамоаси аъзолари илк учрашувни Сибир федерал округи вакилларига қарши ўтказди.

Мазкур ўйин 9:5 ҳисобида ҳамюртларимиз ғалабаси билан якунланди.

“Осиё болалари” ўйинларининг тўртинчи кунги беллашувларида ҳамюртларимиз спорт курашлари, енгил атлетика, маст-рестлинг, сузиш каби қатор спорт турларида иштирок этади.

Мусобақалар 7 июлга қадар давом этади.

Т.Рўзиев,

ЎзА