“Навбаҳор” энг яхши жамоалар қаторида

Футбол бўйича Ўзбекистон миллий чемпионатининг Суперлигаси регламенти асосида Профессионал футбол лигаси барқарорлик рейтингини шакллантириб бормоқда. 2027 йилги мавсумдан эътиборан мазкур кўрсаткичлар бир қатор мезонларга таъсир кўрсатиши кўзда тутилган.

Янги эълон қилинган рейтинга кўра, сўнгги беш йиллик натижалари бўйича юртимизнинг энг яхши клублари – “Пахтакор”, “Насаф” ва “Навбаҳор” бўлиб турибди. Эътиборлиси, пойтахт “шерлари” яқин таъқибчисидан 18 очко илгарилаб кетган. Кучли бешликни эса, Олмалиқнинг “ОКМК” ва Тошкентнинг “Бунёдкор” жамоалари якунлаб беришган.  

Қайд этиш жоиз, сўнгги беш йиллик натижалари 2026 йилги мавсум сўнггида яна ҳисоб-китоб қилинади. Бунда 2021 йилги мавсум натижалари айириб ташланади ва ҳисоблаш 2022 йилги мавсумдан бошланади.

Дарвоқе, аввалроқ ўтган 2025 йилги мавсум бўйича рейтинг эълон қилинган бўлиб, унда Тошкентнинг “Пахтакор”, Қаршининг “Насаф” ва Самарқанднинг “Динамо” клублари дастлабки учликдан жой олганди. “Нефтчи” жамоаси гарчи чемпионликни қўлга киритган бўлсада, клубнинг “U-19” ва “U-21” чемпионатлари, шунингдек, мамлакат кубогидаги натижалари кучли учлик учун камлик қилганди.

Маълумот ўрнида: Темур Кападзе бошчилигидаги "Навбаҳор" жамоаси айни кунларда мавсумга тайёргарликнинг иккинчи босқичи доирасида Туркияда халқаро ўқув йиғинини олиб бормоқда.

Оқилхон Дадабоев, ЎзА