НАТО Россия баёнотларини рад этди, Исроил уч давлат ҳудудида назоратни кенгайтирди
НАТО Украинага АҚШда ишлаб чиқарилган қурол-яроғлар, жумладан ҳаво ҳужумидан мудофаа тизимлари учун ракеталар етказиб бериш давом этаётганини маълум қилди. Брюсселда бўлиб ўтган Ҳарбий қўмита йиғилиши якунида НАТОнинг Европадаги бирлашган кучлари қўмондони генерал Алексус Гринкевич иттифоқчилар томонидан молиялаштирилган барча қуроллар Украина томонига узлуксиз етказилаётганини билдирди. Унинг таъкидлашича, Украина армияси уруш шароитида юқори чидамлилик ва мослашувчанлик намоён этмоқда. Гринкевич Россиянинг НАТО таҳдиди ҳақидаги баёнотларини ҳақиқатга зид деб атаб, альянс барча аъзо давлатлар ҳудудини ҳимоя қилишга тайёр эканини қайд этди.
<iframe width="650" height="420" src="https://www.youtube.com/embed/2aKUrrtOH7w" title="NATO Rossiya bayonotlarini rad etdi, Isroil uch davlat hududida nazoratni kengaytirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Financial Times маълумотига кўра, 2023 йил 7 октябрдан буён давом этаётган уруш фонида Исроил армияси Ливан, Ғазо ва Сурия ҳудудларида қарийб 1000 квадрат километр ер устидан назорат ўрнатган. Бу 1949 йилдаги Исроил ҳудудининг тахминан 5 фоизига тенг. Энг катта улуш Ливан жанубига тўғри келмоқда. Ҳисоботда Исроил кучлари Ливанда “буфер зона” яратгани, Ғазода эса ҳудуднинг катта қисми ҳарбий назорат остида қолаётгани қайд этилган. Сурияда ҳам бир неча юз квадрат километр ҳудуд Исроил назоратига ўтган.
Испанияда Манго асосчиси Исак Андикнинг ўғли Жонатан Андик отасининг ўлими бўйича қотилликда гумон қилиниб ҳибсга олинди. 71 ёшли тадбиркор 2024 йил декабрида Барселона яқинидаги Монсеррат тоғларида баландликдан йиқилиб ҳалок бўлган эди. Дастлаб ҳодиса бахтсиз ҳодиса сифатида баҳоланган, бироқ кейинчалик тергов қайта очилиб, иш қотиллик сифатида қайта таснифланган. Полиция Жонатан Андикни Барселонадаги уйида қўлга олган. У айбловларни рад этиб, тергов билан ҳамкорлик қилаётганини билдирган.
АҚШдаги биотехнология компанияси сунъий муҳитда жўжа очириш бўйича тажриба ўтказди. Компания раҳбари Бен Ламм маълум қилишича, 3D принтерда яратилган тухум пўстлоғига ўхшаш тизимда 26 та жўжа муваффақиятли ривожланиб, дунёга келган. Улар ҳозир бир неча кундан бир неча ойликкача бўлган босқичда парвариш қилинмоқда. Лойиҳа келажакда йўқолиб кетган улкан моа қушини қайта яратиш учун асос бўлиши мумкинлиги айтилмоқда. Олимлар эса бу технологияни “тўлиқ сунъий тухум” эмас, генетик ўзгартирилган жараён сифатида баҳоламоқда.
Reuters агентлиги Европа разведка хизматлари ва махфий ҳужжатларга таянган ҳолда, Хитойда ҳарбий тайёргарликдан ўтган 200 нафарга яқин россиялик ҳарбий ҳозирда Украинага қарши урушда қатнашaётганини ёзди. Маълумотларга кўра, 2025 йил охирида Пекин ва Нанкиндаги ҳарбий академияларда дрон, миномёт, антидрон ҳимояси ва миналаш усуллари бўйича махсус машғулотлар ўтказилган. Reuters’нинг ёзишича, машғулотлар 2025 йил июлида тузилган махфий келишув асосида ташкил этилган. Пекин эса россиялик ҳарбийларни тайёрлаганини рад этиб, Украина можаросида нейтрал позицияда эканини билдирган.
АҚШда Венесуэла президенти Николас Мадурога нисбатан янги жиноий тергов бошланди. Reuters хабарига кўра, Майамидаги федерал прокуратура олиб бораётган суриштирув эҳтимолий пул ювиш ҳолатлари билан боғлиқ. АҚШ Адлия вазирлиги ушбу ишни бошқа суд жараёнларидаги эҳтимолий ҳуқуқий муаммолар учун қўшимча вариант сифатида кўрмоқда. Ҳозирда Мадуро наркотрафик, қурол савдоси ва “наркотерроризм” айбловлари бўйича суд қилинмоқда. Тергов унинг яқин сафдоши Алех Сааб иши билан ҳам боғлиқ экани айтилмоқда.
Нозимбек Мардонов, Салим Обиджонов ЎзА
