Юртимизда "Инсон қадри учун” тамойилини ҳаётга изчил тадбиқ этиш мақсадида аҳолига қулай ва арзонлаштирилган нархларда ҳаво лайнерлари орқали йўловчи ташиш транспорти хизматини кўрсатиш борасида амалий ишлар олиб борилмоқда.
"Uzbekistan airways" авиакомпанияси ташаббуси билан Наманган – Олмаота – Наманган йўналишида янги мунтазам авиақатнов йўлга қўйилди.
Мазкур йўналишдаги авиақатновлар "Шарқий" хаб лойиҳаси доирасида "Uzbekistan airways" авиакомпаниясининг ҳаво кемалари орқали амалга оширилмоқда.
Авиакомпаниянинг "А320" русумли ҳаво кемасида Олмаотага биринчи парвоз шу йилнинг 30 март куни тунгги соат 19:56 да илк маротаба 160 нафар йўловчи билан амалга оширилди. Наманган шаҳридан учтган самолёт кечанинг ўзида соат 23:45да Қозоғистондан юртимизга қайтиб келди.
"Namangan Xalqaro aeroporti" масъулияти чекланган жамияти ахборот хизмати раҳбари Сетора Абдуғаниеванинг ЎзА мухбирига маълум қилишича, Наманган – Олмаота – Наманган йўналишидаги мунтазам авиақатновлар ҳафтанинг чоршанба ва шанба кунлари амалга оширилади.
Оқилхон Дадабоев, Жаҳонгир Акрамов (сурат), ЎзА