Мустақиллик шарафига — юксак эътироф
Ўзбекистон Республикаси давлат мустақиллигининг 35 йиллиги муносабати билан Ўзбекистон истеъмолчилар ҳуқуқларини ҳимоя қилиш жамиятлари федерациясида тантанали тақдирлаш маросими бўлиб ўтди. Мазкур тадбир Ватанимиз мустақиллиги, халқимиз фаровонлиги ва инсон қадрини улуғлаш йўлида сидқидилдан меҳнат қилаётган соҳа фидойиларига кўрсатилаётган юксак эътибор ва эътирофнинг яна бир ифодаси бўлди.
Мустақиллик йилларида мамлакатимизда инсон ҳуқуқ ва манфаатларини таъминлаш, аҳолининг турмуш сифати ва ҳуқуқий маданиятини юксалтириш, фуқароларнинг мурожаатларига эътибор билан ёндашиш давлат ва жамият ҳаётининг устувор йўналишларидан бирига айланди. Истеъмолчилар ҳуқуқларини ҳимоя қилиш тизими ҳам ана шу эзгу мақсадларга хизмат қилиб, аҳоли билан бевосита мулоқот қилиш, уларнинг қонуний манфаатларини таъминлаш ва истеъмол маданиятини оширишда муҳим ўрин тутмоқда.
Тантанали маросимда Федерация раиси иштирокчиларни Ўзбекистон Республикаси мустақиллигининг 35 йиллик байрами билан самимий муборакбод этди. У ўз сўзида мустақиллик халқимизнинг энг улуғ неъмати, мамлакатимиз тараққиёти ва тинч-осойишта ҳаётимизнинг мустаҳкам асоси эканини таъкидлаб, бугунги кунда ҳар бир соҳада амалга оширилаётган ислоҳотлар инсон қадри ва халқ манфаатларига хизмат қилаётганини қайд этди.
Федерация раиси, шунингдек, истеъмолчилар ҳуқуқларини ҳимоя қилиш соҳасида меҳнат қилаётган фаолларнинг аҳоли мурожаатларини ўрганиш, муаммоларга қонуний ечим топиш, жамоатчилик назоратини кучайтириш, истеъмолчиларнинг ҳуқуқий билим ва маданиятини ошириш борасидаги меҳнатларига алоҳида тўхталди. Бу йўлдаги ҳар бир амалий натижа, ҳар бир ҳал этилган мурожаат ва ҳар бир ҳимоя қилинган фуқаро манфаати жамиятда адолат ва ишонч муҳитини мустаҳкамлашга хизмат қилиши таъкидланди.
Тадбирда Ўзбекистон Республикаси Президентининг тегишли фармони асосида белгиланган тартибга мувофиқ, «Ўзбекистон Республикаси мустақиллигининг 35 йиллиги» эсдалик нишонлари Ўзбекистон Республикаси Президенти номидан тақдирланувчиларга тантанали равишда топширилди.
Ушбу юксак эътироф тақдирланганларнинг мамлакатимиз тараққиётига, фуқароларнинг ҳуқуқ ва қонуний манфаатларини таъминлашга, истеъмолчилар ҳуқуқларини ҳимоя қилиш тизимини янада такомиллаштиришга қўшаётган муносиб ҳиссасига берилган юксак баҳодир. Шу билан бирга, бундай эътибор соҳа вакилларининг зиммасига янада катта масъулият юклаб, уларни янги ташаббуслар, самарали меҳнат ва халқ хизмати йўлида янада фаол бўлишга ундайди.
Федерация раиси мукофот соҳибларини самимий қутлаб, уларнинг кўп йиллик меҳнати, ташаббускорлиги ва фидойилиги Федерация тизимидаги барча ходимлар учун ибрат эканини таъкидлади. Тақдирланганларга келгуси фаолиятларида мустаҳкам соғлик, оилавий хотиржамлик, янги ютуқлар ва эл-юрт манфаати йўлидаги эзгу ишларида улкан муваффақиятлар тилади.
Ўз навбатида, тақдирланганлар билдирилган юксак ишонч ва эътибор учун миннатдорлик изҳор этиб, ушбу мукофотни нафақат шахсий меҳнатларига, балки бутун жамоанинг саъй-ҳаракатларига берилган муносиб баҳо сифатида қабул қилишларини билдирдилар. Улар бундан буён ҳам Ватан равнақи, халқ фаровонлиги ва истеъмолчиларнинг ҳуқуқ ҳамда қонуний манфаатларини ишончли ҳимоя қилиш йўлида бор билим ва тажрибаларини сафарбар этишларини таъкидладилар.
Тадбир давомида мустақиллик йилларида эришилган ютуқлар, инсон қадрини улуғлаш ва жамиятда ҳуқуқий маданиятни юксалтиришга қаратилган ислоҳотларнинг аҳамияти ҳақида фикр-мулоҳазалар билдирилди. Айниқса, аҳоли билан очиқ мулоқот, мурожаатларни холис ва тезкор ўрганиш, истеъмолчилар манфаатларини ҳимоя қилишда таъсирчан жамоатчилик назоратини йўлга қўйиш Федерациянинг келгусидаги фаолиятида ҳам устувор вазифа бўлиб қолиши қайд этилди.
Мустақиллигимизнинг 35 йиллиги муносабати билан ташкил этилган мазкур тақдирлаш маросими юксак ватанпарварлик руҳи, самимий табриклар ва эзгу тилаклар остида ўтди. Тадбир иштирокчилари учун бу кун Ватанга садоқат, халққа хизмат ва қонун устуворлиги йўлидаги меҳнат ҳар доим муносиб қадрланишини намоён этган унутилмас лаҳзалардан бири бўлди.
ЎзА
