Микрокредитбанк тизимда шаффофлик қандай таъминланмоқда?
“Микрокредитбанк”да жорий йилнинг биринчи ярмида коррупциянинг олдини олиш, манфаатлар тўқнашувини аниқлаш ҳамда тизимдаги коррупциявий хавфларни камайтириш бўйича амалга оширилган ишлар ва истиқболдаги вазифалар тақдим этилди.
Ушбу “Жамоатчилик эшитуви”да банк масъуллари, Коррупцияга қарши курашиш агентлиги вакиллари ва журналистлар иштирок этди.
Ҳисобот даврида банкнинг барча ҳудудий бўлинмаларини қамраб олган 22 та семинар-тренингда 2 750 нафар ходимнинг коррупцияга қарши курашиш бўйича билим ва кўникмалари оширилгани қайд этилди. Шунингдек, “CERT International” мутахассислари иштирокида 25 нафар ходим ISO 37001:2025 халқаро стандарти бўйича ўқитилиб, тегишли сертификатларга эга бўлди.
Коррупциявий хавфларни барвақт аниқлаш мақсадида ўтказилган аноним сўровномаларда 1 840 нафар ходим ва 2 180 нафар фуқаро ҳамда тадбиркорлар иштирок этган. Сўровнома натижалари коррупциявий хавфнинг асосий қисми кредитлаш ва молиялаштириш жараёнларига (46 фоиз), мансаб ваколатларини суиистеъмол қилишга (19 фоиз) ва ишга қабул қилишга (12 фоиз) тўғри келишини кўрсатди. Ушбу таҳлиллар асосида кредит ажратишда инсон омилини камайтириш, автоматик баҳолаш ва видеофиксацияни кенгайтириш бўйича таклифлар ишлаб чиқилди.
MKBANKда фаолият юритаётган 6 та алоқа канали орқали 6 ой давомида 96 та мурожаат келиб тушди. Уларнинг 73 таси бўйича хизмат текширувлари ўтказилиб, операцион хатоликлар бартараф этилди. Шу билан бирга, Коррупцияга қарши назорат департаменти ўтказган 67 та хизмат текшируви натижасида 2 та коррупциявий ҳолат аниқланиб, ҳужжатлар ҳуқуқни муҳофаза қилувчи органларга юборилди. Ўтказилган таҳлиллар асосида Сурхондарё, Навоий ва Наманган вилоятлари коррупциявий хавф юқори бўлган «қизил ҳудудлар» сифатида белгиланди.
Тизимда манфаатлар тўқнашувининг олдини олиш мақсадида 3 331 нафар ходимнинг йиллик декларациялари таҳлил қилиниб, 5 та мавжуд ҳамда 216 та эҳтимолий манфаатлар тўқнашуви аниқланди ва уларни бартараф этиш бўйича зарур чоралар кўрилди. Шунингдек, банк таркибида Манфаатлар тўқнашувининг олдини олиш ва харидлар устидан назорат қилиш бўлими ташкил этилиб, кредит-инвестиция жараёнларида 36 та комплекс комплаенс-текширув ўтказилди.
Жорий йилнинг иккинчи ярмида MKBANK «қизил ҳудудларда» комплекс ўрганишлар ва «Сирли мижоз» тадбирларини ўтказиш, ходимлар учун тренингларни кучайтириш ҳамда манфаатлар тўқнашувини електрон шаклда назорат қилиш механизмларини ривожлантиришни режалаштирган. Банк ўз фаолиятида ҳалоллик ва шаффофлик тамойилларига таянган ҳолда коррупцияга нисбатан муросасиз муносабатни шакллантиришда изчил давом этади.
И.Аввалбоев,
ЎзА мухбири
Реклама ҳуқуқи асосида
