Мехикода ҳам оммавий норозилик...
Маҳаллий ОАВ хабарига кўра, футбол бўйича жаҳон чемпионати очилиши кунида Мехико шаҳрининг камида етти жойида норозилик юриши режалаштирилган. Намойишга турнирнинг биринчи ўйини – Мексика ва Жанубий Африка учрашуви бўлиб ўтадиган стадион яқинида тайёргарлик кўриляпти.
Тадбирда турли гуруҳлар, жумладан сўнгги йилларда зўравонлик ва жиноятчилик натижасида бедарак йўқолганларнинг қариндошлари, ўқитувчилар, давлат идоралари хизматчилари, тиббиёт ходимлари, фермерлар ва маҳаллий аҳоли кўчирилаётган маҳаллаларни қайта қуришга қарши норози фаоллар иштирок этиши кутиляпти. Улар иш ҳақи оширилиши, ижтимоий кафолат таъминланиши, хавфсизлик яхшиланиши ва йўқолганларни қидириш бўйича ҳукумат саъй-ҳаракати кучайтирилиши сингари талаблар қўймоқда.
Расмийлар намойишчиларга қарши куч ишлатмай, тадбирни тинч ўтказиш таъминланишини маълум қилишди. Баъзи юришлар ўйин бошланишида стадионга йўналтирилиши кутилмоқда. Бу ҳудудда транспорт ҳаракатига халақит бериши мумкин.
Инсон ҳуқуқи ташкилотлари баёнотига кўра, Мексикада 130 000 дан ортиқ одамнинг тақдири номаълум. Уларнинг яқинлари мусобақага халқаро даражадаги эътибордан фойдаланиб, шу масалани кўтаришга уринмоқда.
С.Раҳимов, ЎзА
