Президент Шавкат Мирзиёев бугун Кармана туманида Ўзбекистондаги дастлабки йирик қуёш фотоэлектр станциясини ишга тушириш маросимида иштирок этди. Маросимда муҳандис ва қурувчилар, навоийлик нуронийлар ва ёшлар, шунингдек, хорижий инвесторлар билан самимий мулоқот бўлди.
Вилоят ёш тадбиркорлари номидан сўзга чиққан Зулфия номидаги давлат мукофоти соҳибаси, Навоий давлат педагогика институти магистранти Мерей Омонбоеванинг сўзлари кўпчиликни тўлқинлантирди.
– Ҳурматли Президент, сизнинг келганингиздан биз “дух” олдик, куч олдик десам адашмайман, – деди нуроталик Мерей Омонбоева қозоқ тилида.
– “Дух” олдик деяверинг, менга ёқади, – деди Президент.
– Рухсат берсангиз ўзбек тилида сўзласам. Ёш тадбиркорман, чорвачилик кластери раҳбариман. Қишлоқда оилавий боғча ташкил қилганман, бизнес йўналишида тренерлик қиламан. Сизнинг Ёшлар ва талабалар форумида, ўтган ҳафта тадбиркорлар билан очиқ мулоқотда сўзлаган нутқингизни тинглаб жуда тўлқинландим. Бу бизга турли лойиҳаларни амалга оширишга туртки берди. Вилоятимизга ҳар келганингизда биз ёшлар янги куч оламиз, бизга имконият бериляптими унинг самарасини кўрсатишга ҳаракат қиламиз. Бугунги учрашув ҳам шундай.
Мен сизга бир нарсани айтмоқчиман: илгари туман ҳокимларининг яқинига йўлаб бўлмасди. Ҳозирги очиқлик сиёсатидан фойдаланиб биз керак бўлса вазирлар билан бемалол гаплашяпмиз. Берилган бундай имкониятлардан фойдаланиб, бизнес тренер сифатида вилоятимиз ёшларини, хотин-қизларини тадбиркорлик бўйича билимини оширишга, улар орасидан янги-янги тадбиркорлар етишиб чиқишига кўмаклашишга ваъда бераман, – деди Мерей.
Президент тадбиркорлар билан очиқ мулоқот олдидан мамлакатимиздаги 100 нафар тадбиркорга миннатдорчилик йўллаганини, Мерейга ҳам шундай миннатдорлик билдириб, улар сафини 101 тага етказишини таъкидлади. Шу билан бирга, Навоий ёшларига миннатдорлик рамзи сифатида Мерейга юртимизда ишлаб чиқарилган енгил автомобиль берилишини маълум қилди.
– Сиздаги жўшқинликни кўриб навоийлик ёшлар шижоатига тан бердим. Эртага вилоят ҳокими сизга енгил автомобилни топширади. Сиз мени вакилим сифатида вилоят ёшларини бирлаштириб, улардаги жўшқинликни оширишга ҳисса қўшсангиз шу мен учун жуда катта ютуқ, – деди Шавкат Мирзиёев.
Икром Аввалбоев, ЎзА