Мерц: Украина келажакда Европа Иттифоқига аъзо бўлади (+видео)
Германия канцлери Фридрих Мерц Бундестагдаги ҳукумат баёнотида Украинага кўмак давом эттирилишини тасдиқлади ва истиқболда Европа Иттифоқига аъзо бўлишига ишонч билдирди, деб хабар берди DW нашри.
Унинг таъкидлашича, Россия –Украина урушига барҳам бериш фақат Украина, Россия, Европа ва АҚШ иштирокидаги музокаралар орқали амалга ошиши мумкин.
Канцлер Европа Иттифоқи Украина учун 90 миллиард евролик кредитни маъқуллаганини ҳам маълум қилди. Шунингдек, Россияга нисбатан босим кучайтирилаётгани ва 21-пакет санкциялар устида иш бошланганини қайд этди.
Мерцнинг сўзларига кўра, НАТОнинг шарқий қаноти ҳам мустаҳкамланмоқда. Шу билан бирга, Германия Россиянинг Украинага қарши агрессив урушини музокаралар йўли билан тугатишга қаратилган саъй-ҳаракатларни қўллаб-қувватлашда давом этади.
Мерц Украина нафақат ўз эркинлиги, балки бутун Европа хавфсизлигини ҳам ҳимоя қилаётганини таъкидлади. Шу муносабат билан Мерц Украинага Европа Иттифоқига тўлиқ аъзоликдан олдинги махсус ҳамкорлик мақомини беришни таклиф қилди.
Таклифга кўра, Украина Европа Иттифоқи Кенгаши йиғилишларида қатнашиш, Брюсселда ўз вакилига эга бўлиш ва Европа парламенти муҳокамаларида иштирок этиш имкониятини қўлга киритади. Бироқ бу босқичда овоз бериш ҳуқуқи назарда тутилмаган.
Аввалроқ, Володимир Зеленский мазкур таклифни танқид қилиб, уни Украина учун адолатсиз ёндашув деб баҳолаган эди.
Шунга қарамай, Украина парламенти хавфсизлик ва мудофаа харажатларини 1,5 триллион гривнага оширишни маъқуллади. Бу маблағларнинг катта қисми Европа Иттифоқи томонидан ажратилган ёрдам кредитлари ҳисобидан қопланиши кутилмоқда.
Россияга қарши янги санкциялар пакети эса Европа томонидан муҳокама қилинишда давом этмоқда.
<iframe width="650" height="420" src="https://www.youtube.com/embed/Yf7BqdAssa4" title="Mers: Ukraina kelajakda Yevropa Ittifoqiga a’zo bo‘ladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салим Обиджонов, ЎзА
