Кушнер Украина бўйича кейинги музокарада Европа ҳам иштирок этишини таъкидлади
– Кейинги музокара босқичини Европадаги ҳамкорларимиз билан кенгайтириш тўғрисида келишувга эришдик, деб ёзди ижтимоий тармоқ саҳифасида АҚШ Президенти элчиси Жаред Кушнер Абу-Даби, Москва ва Дублиндаги уч кунлик дипломатик алоқаларни сарҳисоб қилар экан. – Бу бизга урушдан кейинги Европа хавфсизлиги мавзусини кенгроқ кўламда муҳокама қилиш имконини беради.
У ҳарбий ҳаракат тўхтатилиши ишончли хавфсизлик кафолатини таъминлаш, можаронинг олдини олиш механизмини яратиш ва тўқнашув қайта бошланишига йўл қўймаслик бўйича ўзаро мажбурият талаб қилишини таъкидлади. Шунингдек, кейинги музокара жадвали ва тафсилотини айтишга ваъда берди.
– Тез орада музокара йўналиши, жадвали ва қўшимча тафсилоти эълон қилинишини кутяпмиз, – деган у. – Россия ва Украина ўртасида энг кўп маҳбуслар алмашинуви ташаббуси устида ҳам иш олиб бориляпти.
Тинчлик жараёнининг бир қисми сифатида янги учрашувни АҚШ Президенти махсус вакили Стив Уиткофф ҳам маълум қилган, аммо ким билан ва қачон бўлиб ўтиши аниқ айтилмаган.
– Яна бир учрашув режалаштирилган, – деди Уиткофф Ирландияда Владимир Зеленский билан учрашувдан сўнг журналистларга.
Россия Президенти Владимир Путин пайшанба куни Кремлда АҚШ Президентининг махсус вакиллари Стив Уиткофф ва Жаред Кушнер билан учрашди. Мулоқотдан сўнг РФ етакчисининг ёрдамчиси Юрий Ушаков Европа мамлакатлари Украина билан музокара жараёнида иштирок этишга ҳаракат қилаётгани, бироқ улар уруш ёки тинчликни хоҳлашини аниқ белгилаб олишлари кераклигини айтди. Шунингдек, Европа ҳозиргача амалга оширган барча амалий ҳаракат можарони давом эттириш истагини кўрсатаётганини таъкидлади.
С.Раҳимов, ЎзА
