Дунё олимлари космонавтиканинг асл ватани Ўзбекистон эканини аллақачон тан олган.

1957 йилда илк бор сунъий йўлдош ернинг гравитацион йўлдошини тарк этди. Мана шу буюк кашфиётда Ибн Синонинг ҳиссаси бор. Чунки космик кеманинг ишлаш принципи импульс сақланиш қонунига асосланган. Демак, космосга чиқаётган ҳар битта космик кемада Абу Али Ибн Синонинг, космик кемаларнинг ичида ишлаётган ҳар ускунанинг ишлаш принципида Ал-Хоразмийнинг ғояси ётибди.  

Бир пайтлар Владимир Жонибеков, Солижон Шарипов каби ўзбек йигитлари космосга чиққанини эслайлик. Бугун уларнинг издошларини тарбиялаш, космонавтика соҳасини ривожлантириш мақсадида юртимизда саъй-ҳаракатлар бошланган.  

Космонавтикани ривожлантириш мақсадида «Ўзбеккосмос» агентлиги тузилган.  

Агентлик ходимлари Тошкент шаҳар «Планетарий»си билан ҳамкорликда форум ташкил қилди.  

Форумни ташкил этишдан асосий мақсад – космонавтика соҳасида ёшлар, талабалар ҳамда мактаб ўқувчиларининг билим савияси ва кўникмаларини оширишдан иборат. Дастлаб «Планетарий» биносида «Астраномиянинг буюк асосчилари» номли кўргазмали бурчакнинг очилиш маросими бўлиб ўтди.  

Тадбирнинг асосий қисмида NASA астронавти ва Халқаро космик станция қўмондони сифатида 40 йилдан ортиқ авиация ва космик тажрибага эга бўлган Майкл Лопес-Алегрия билан «Юлдузли суҳбат: астронавт билан космик саргузаштлар» мавзусида Zoom платформаси  орқали учрашув ташкил этилди.  

Майкл Лопез-Алегриа АҚШ ҳарбий-денгиз флоти ва NASAда турли лавозимларда ишлаган ва жуда катта космик тажрибага эга. Шунингдек, энг кўп космик саёҳатлар ёки «космик юришлар» ва космосда юриш вақти бўйича NASA рекордини қўлга киритган.  

Учрашувда Президент мактаби ўқувчилари, М.Улуғбек номидаги ихтисослаштирилган мактаб, Вестминстер ва Alfraganus университети талабалари қатнашиб, ўзларини қизиқтирган саволларга жавоб олди.  

Форум давомида "Планетарий" биносида «Ўзбеккосмос» агентлиги томонидан космик суратлар кўргазмаси ҳам бўлиб ўтди. Тадбир қатнашчилари у ерда космосдан олинган турли эксклюзив тасвирларни кўриш имконига эга бўлди. Шунингдек, Павел Бенков номидаги Республика ихтисослаштирилган рассомлик мактаби ўқувчи-ёшлари ўз ижодларини намойиш этди.  

<iframe width="560" height="315" src="https://www.youtube.com/embed/kSzk2ggJj0w?si=WVD4vU_CZvWdZpmm" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Раҳмонова, А.Содиқов, У.Тўхтаев (видео), ЎзА