Жавоҳир Синдоров бугун АҚШ шахматчилари билан куч синашади
Бугун, 4 август куни АҚШда шахмат бўйича “Saint Louis Rapid & Blitz 2026” турнирининг рапид йўналишидаги 7-8-тур ўйинлари бўлиб ўтади.
Маҳоратли шахматчимиз Жавоҳир Синдоров мазкур турларда оқ доналарда америкалик Леньер Домингес Перез ва Авондер Лианг билан куч синашади.
Умумий мукофот жамғармаси 200 минг АҚШ долларидан иборат халқаро турнирнинг ортда қолган 4, 5 ва 6-тур ўйинларида Синдоров ҳиндистонлик Праггнанандха Рамешбабу, АҚШ вакиллари Левон Аронян ва Фабиано Каруана билан дурангга эришди.
“Grand Chess Tour” сериясининг навбатдаги босқичи ҳисобланган ушбу мусобақанинг 7-тур ўйинлари остонасида Праггнанандха Рамешбабу 9 очко билан пешқадамлик қилмоқда. Жавоҳир Синдоров 7 очко жамғарган ҳолда 2-ўринни банд этиб турибди.
Леньер Домингес Перез, Уэсли Со (АҚШ), Аниш Гири (Нидерландия), Винсент Кеймер (Германия), Левон Аронян (АҚШ), 6 очко билан кейинги қаторларни банд этишган.
Америкалик Фабиано Каруана (АҚШ) ҳамда Жорден ван Форест (Нидерландия) 5 очко билан охирги ўринларда ҳаракатланмоқда.
Халқаро турнир дастурига биноан 9 та турдан иборат рапид мусобақалари 5 августга қадар давом этади. Шундан сўнг 5-7 август кунлари 9 та турдан иборат блиц баҳслари ташкил этилади.
Эслатиб ўтамиз, турнирда 1-ўринни эгаллаган шахматчи 50 минг АҚШ доллари билан тақдирланади.
Т.Рўзиев,
ЎзА
