Жавоҳир Синдоров Борис Гельфан билан “жанг” ўтказади
АҚШнинг Шимолий Каролина штатидаги Шарлотт шаҳрида давом этаётган “Naroditsky Memorial Rapid & Blitz” мусобақасининг рапид йўналишида ғолибликка эришган Синдоров мусобақалар якунига кўра, турнирнинг умумий ғолиблиги учун курашиш имкониятига эга чиқди.
Мазкур халқаро мусобақанинг блиц баҳсларида эса терма жамоамизнинг яна бир аъзоси Муҳиддин Мадаминов муваффақиятга эришди.
Кеча ўтказилган саралаш босқичида Муҳиддин Мадаминов ажойиб натижа қайд этди. У 8 очко билан қўшимча кўрсаткичларга кўра, 2-ўринни эгаллади. Биринчи ўрин соҳиби америкалик Ҳикару Накамура ҳисобида 8,5 очко бор. Мадаминов ва Накамуранинг ўзаро партиясида томонлар муроса йўлини танлагани ҳамюртимизнинг ўзига хос ўйин амалиётига эга бўлганини кўрсатди.
Жавоҳир Синдоров саралашда асосий тўрга йўлланма берувчи тай-брек учрашувида америкалик Лейниер Домингес Перес билан рўбарў келди. Муросасиз кечган илк партияда дурангга эришилди. Иккинчи ўйинда эса Синдоров устунликка эга чиққан ҳолда финалга йўл олди.
Энди Жавоҳир Синдоров иккинчи гуруҳда рақибларини мағлуб этган исроиллик тажрибали шахматчи Борис Гельфан билан турнирнинг “Мастерс” гуруҳи ғолиблиги учун кураш олиб боради.
Т. Рўзиев, ЎзА
