Жавоҳир Синдоров бугун Магнус Карлсен билан дона суради
Бугун, 7 сентябрь куни Ҳиндистоннинг Бангалор шаҳрида шахмат бўйича жамоалар ўртасида ўтаётган “Tech Mahindra Global Chess League” турнири доирасида Жавоҳир Синдоров Магнус Карлсенга қарши дона суради.
Синдоров етакчилигидаги “FYERS American Gambits” жамоаси учинчи кунги мусобақада Магнус Карлсен сардорлигидаги "Alpine APL Pipers” жамоасига тўқнаш келади.
Мазкур баҳсда Синдоров Карлсен қаршилигини енгишга ҳаракат қилади.
Глобал шахмат лигаси тизимидаги мазкур мусобақада Ян Непомняший етакчилигидаги “Ganges Grandmasters” жамоасига қарши кечган баҳсда Жавоҳир Синдоров жамоасига омад кулиб боқмади.
Шиддатли ва ўзига хос тарзда ўтган баҳсда “FYERS American Gambits” жамоаси “Ganges Grandmasters” жамоасига 7:9 ҳисобида имкониятни бой бериб қўйди.
Турнирнинг биринчи ва иккинчи кунги ўйинларида Жавоҳир Синдоров, Бибисара Ассаубаева, Нихал Сарин, Даниил Дубов, Сара Хадем ва жамоа менежери Марк'Андрия Мауриццидан иборат “FYERS American Gambits” жамоаси “PBG Alaskan Knights” жамоасини 10:4, “Triveni Continental Kings” шахматчиларини 14:5 ҳисобида мағлуб этди. Ортда қолган кунда кичик фарқ билан очко йўқотиши ортидан жамоа 31 балл ва 6 очко билан турнир жадвалидаги етакчиликни давом эттирмоқда.
Кейинги ўринлардан жой олган “Ganges Grandmasters” жамоаси 25 балл ва 6 очкога ҳамда Магнус Карлсен сардорлигидаги "Alpine APL Pipers” жамоаси 21 балл, 6 очкога эга бўлиб турибди.
Умумий мукофот жамғармаси 1 миллион АҚШ долларидан иборат мазкур турнир 12 сентябрга қадар давом этади.
Т.Рўзиев,
ЎзА
