Жаҳон чемпионлари тантанали кутиб олинди
Хитой ва Қозоғистонда оғир атлетика ҳамда миллий спортимиз кураш бўйича ўтказилган жаҳон чемпионатларида ғолибликка эришган спортчиларимиз юртимизга қайтиб келишди. Пойтахт аэропортида музаффар спортчиларни кутиб олиш тантанали ташкил этилди.
Хитойнинг Нингбо шаҳрида ўтказилган катталар ўртасидаги жаҳон чемпионатида муваффақиятли иштирок этган оғир атлетикачиларимиз ҳамда Қозоғистоннинг Остона шаҳрида 13 та медаллар шодасини қўлга киритган кураш бўйича Ўзбекистон терма жамоаси аъзолари пойтахт аэропортида тантанали кутиб олинди.
Ислом Каримов номидаги Тошкент халқаро аэропортида спортчиларимизни кутиб олиш маросимида Ўзбекистон Республикаси Мудофаа, Спорт вазирлиги, Ўзбекистон оғир атлетика ва кураш федерацияси мутасаддилари, кенг жамоатчилик вакиллари, воҳаю водийдан келган спортчиларнинг ота-оналари, яқинлари иштирок этди.
Таъкидланганидек, Хитойда кечган жаҳон чемпионатида Акбар Жўраевнинг 3 та олтин медалга сазовор бўлиши, жаҳон рекордларини яна бир карра янгилаганлиги, курашчиларимизнинг Остонада ўтган жаҳон чемпионатида 9 та олтин, 3 та кумуш ва 1 та бронза медалларига эгалик қилганлиги янги Ўзбекистон спортининг янги ғалабалари бардавом эканлигини яна бир карра амалда исботлади.
-Бугунги кутиб олиш маросими ҳар қачонгидан ҳам ўзгача кайфият, руҳиятга эгалиги билан алоҳида ажралиб туради. Боиси, Остонада миллий спортимиз бўйича ўтган дунё биринчилигида полвонларимизнинг зафар қучганлиги алоҳида эътирофга лойиқ воқелик бўлса, Акбар Жўраевнинг оғир атлетиканинг энг оғир вазнида жаҳон чемпионлиги билан бирга янги дунё рекордини қайд этиши барчамизга катта ғурур ва қувонч бағишлади, - дейди кутиб олиш маросимида иштирок этган фарғоналик мураббий, кураш ва белбоғли кураш бўйича тажрибали мураббий Содиқ Деҳқонов.
Кутиб олиш маросимида Хитой ва Қозоғистон спорт майдонларида ватанимиз спорт шарафини улуғлаган спортчиларга гуллар тақдим этилди, зарбоф тунлар кийдирилди. Эзгу истаклар билдирилди. Келгуси мусобақаларда янги ғалабалар ёр бўлишини тилашди.
Эътиборли жиҳати, замонавий кўринишда фаолият юритаётган Тошкент халқаро аэропортида ғолиб спортчиларни кутиб олиш тантаналари байрамга айланиб кетди. Унинг шукуҳи, қувончли лаҳзалари энди ҳудудларда, маҳаллаларда, оилаларда давом этади.
Тўлқин Рўзиев, ЎзА
