РАСМИЙ МУНОСАБАТ

Бухоро давлат тиббиёт институти мансабдор шахсларининг ноқонуний хатти-ҳаракатлари юзасидан эълон қилинган мақолада қайд қилинган ҳолатлар муқаддам Бош прокуратура ҳузуридаги Иқтисодий жиноятларга қарши курашиш департаменти вилоят бошқармаси ҳамда бошқа мутасадди идоралар билан ҳамкорликда ўрганилган.

Ўрганиш натижасида мақоладаги важлар қисман ўз тасдиғини топиб, «Одам анатомияси» Атлас китобини харид қилиш бўйича нашр этиш учун тегишли рухсатномага эга бўлмаган “Bitubi Grupp” МЧЖ билан дастлабки (13.08.2019 йилдаги 1-сон) шартнома тузилганлиги аниқланган.

Ёки, хизмат автомашинасида лимитга нисбатан ортиқча 8.7 млн. сўмлик ёқилғи сарфланганлиги аниқланган ҳамда зарар қайтарилган.

Бундан ташқари, институт ҳайдовчиси Б.Д.нинг меҳнат шартномаси ноқонуний бекор қилинганлиги ҳолати бўйича вилоят прокуратураси томонидан 18.03.2021 йилда – мақола эълон қилингунига қадар буйруқни бекор қилиш бўйича протест келтирилган.

Шунингдек, тўлов-контракт тушумларидан тушадиган ажратмалар Соғлиқни сақлаш вазирлигининг ривожлантириш жамғармасига ўтказмалар ўз вақтида ўтказиб берилмаганлиги аниқланиб, тўлиқ ўтказиб берилиши таъминланган.

Ўрганиш натижалари бўйича Департаментнинг вилоят бошқармаси томонидан Коррупцияга қарши курашиш агентлигига 22.04.2021 йилда ахборот тақдим этилган.

Агентлик томонидан ўрганиш натижалари умумлаштирилган ҳолда 26.04.2021 йилда anticorruption.uz интернет саҳифасида расмий муносабат билдирилган.

Шу билан бирга вилоят прокуратураси томонидан 30.04.2021 йилда Олий таълим ва Соғлиқни сақлаш вазирлигига тақдимнома киритилган.

 

ЎзА