Янги маълумотларга кўра, Италия Европа Иттифоқи ҳудудидаги кондиционердан энг кўп фойдаланадиган давлат ҳисобланади. Кейинги ўринларда Греция, Франция, Испания ва Германия.

Европа ўта иссиқ тўлқин ва жазирамадан азият чекаётган бир пайт кондиционер энг зарур воситага айланган ва кўпчилик томонидан ҳашам эмас, балки эҳтиёж сифатида қабул қилинмоқда.

Нега айнан Италияда кондиционерга эҳтиёж кучли?

Евростат маълумотига кўра, ЕИ таркибидаги 27 давлат орасида кондиционер учун сарфланадиган электр энергиясининг учдан бири ушбу давлат ҳиссасига тўғри келади. Бу умумий миқдордаги энергия сарфига нисбатан энг кўп улуш. Ваҳоланки, Апеннин ярим оролида электр энергияси нархи қитъа бўйича энг қиммат.

Италия сўнгги йилларда мунтазам равишда шиддатли иссиқлик тўлқинига дуч келмоқда. Айниқса Сицилия, Сардиния каби минтақаларда ҳарорат 48°C даражагача кўтариляпти. Дарвоқе, ушбу мамлакат Европада энг кекса ёшли аҳолига эга ҳисобланади. Ёши улуғлар эса юқори ҳароратни сезувчан.

Умуман, кондиционер ЕИ миқёсида уй хўжалиги жами электр энергияси истеъмолида атиги 0,6 фоизни ташкил қилади. Энергиянинг кўп қисми иситиш, иссиқ сув тайёрлаш ва ёритишга сарфланади. Демак, кўҳна қитъада кондиционердан фойдаланиш кўлами кенгайган бўлса-да, электрни тежаб ишлатиш тенденцияси давом этмоқда.

<iframe width="560" height="315" src="https://www.youtube.com/embed/eaD_rLyZEyU?si=l_u5ge5UO7n3upai" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА