Ҳурмузда 2 нефть танкери портлади
Эрон Ислом инқилоби қўриқчилари корпуси Ҳарбий-денгиз кучлари пайшанба куни Ҳурмуз бўғозида икки йирик нефть танкери портлаганини маълум қилди. Теҳрон томони билдиришича, кемалар белгиланган ҳаракат йўналишини бузган ва ҳаракатни бошқариш маркази томонидан бир неча бор берилган огоҳлантиришга бўйсунмаган.
Ҳодиса чоршанба куни кечқурун ҳудуднинг жанубий қисмида содир бўлган. Портлаш оқибатида жами 4 миллион баррелдан ортиқ хом ашё олиб кетаётган икки супер танкер ҳаракатдан тўхтаган.
Қўриқчилар корпуси кемаларни АҚШ ҳарбийлари билан ҳамкорлик қилишда айблади. Шунингдек, Форс кўрфази ёки Ҳурмузда алоқа тизимини ўчириб, Америка ҳарбийлари кўмагида жанубий йўналишдан ўтишга уринган бошқа кемалар ҳам шундай оқибатга дуч келишидан огоҳлантирди. Ҳозирча танкерларнинг номи ва портлаш сабаби ҳақида батафсил маълумот берилмаган.
Воқеа жаҳон энергетика бозори учун стратегик аҳамиятга эга Ҳурмуз бўғозида кема ҳаракати юзасидан Эрон ва АҚШ ўртасидаги кескинлик кучайган бир пайтда содир бўлди. Эслатиб ўтамиз, 28 февраль куни АҚШ ва Исроилнинг Эронга берган зарбалари ортидан бошланган қарама-қаршилик апрель ойидаги сулҳга қарамай, қайта авж олган. Июнь ойида ўзаро англашув меморандуми имзоланган бўлса-да, музокара натижа бермаган ва вазият янада кескинлашган.
Ф.Яхшибоева, ЎзА
