Энди Гулистон шаҳридан Тошкент вилоятининг Бўстонлик туманидаги Чиноркент бекатигача тез юрар электропоезд қатнайди.

--Барча шарт-шароит,  иситиш ва совитиш тизимига эга бўлган  электропоезд вагонлари Россия давлатида ишлаб чиқарилган бўлиб, кенг, шинам ва хавфсизлиги билан  ажралиб туради. 6 та вагондан иборат бўлган мазкур электропоезднинг  умумий сиғими 586 йўловчига мўлжалланган, тик ҳолатда кетувчи йўловчилар  билан ҳисоблаганда бир вақтнинг ўзида мингдан ортиқ йўловчига хизмат кўрсатади, --дейди "Ўзбекистон темир йўллари" АЖ шаҳар атрофида йўловчи ташиш МЧЖ маркетинг ва сервис хизмат кўрсатиш бўйича директори ўринбосари Дилмурод Убайдуллаев.--Ушбу электропоезд  

Гулистондан Чиноркентгача бўлган масофани 3 соату 30 дақиқада босиб ўтади.

Йўл ҳақи ҳам қиммат эмас. Гулистондан Тошкентгача 20 минг сўм бўлса,  Чиноркентгача катталар учун йўл ҳақи 40 минг сўм, болалар учун эса 23 минг сўм. Тўловни АТТО транспорт картаси ёрдамида тўлаш ёки чипталарни темирйўл чиптахоналаридан ҳам харид қилиш мумкин.

Электропоезд ҳаракатланиш жадвалига асосан ҳар куни қатнайди.Гулистондан тонги соат  6:11 да йўлга чиқса, Чиноркентдан  Гулистонга қараб 15:43 да жўнаб, 19:00 да Гулистонга етиб келади.

Бугун унинг биринчи йўловчилари фахрийлар, нуронийлар, ОАВ вакиллари бўлишди.

Ушбу йўналишда электропоезд қатнови йўлга қўйилгани сирдарёлик саёҳатчиларга  Чиноркентга бориб,  Бўстонликнинг гўзал манзараларини томоша қилиб,  мароқли ҳордиқ чиқариб қайтиш имконини беради.  

Ғулом Примов,

Шаҳриёр Ортиқбоев(сурат),  

ЎзА  мухбирлари