2024 йил декабрь ойида Тошкентдан Хўжакентга янги электропоезд қатнови йўлга қўйилган эди. 6 декабрь куни Президент Шавкат Мирзиёев янги электропоездни кўздан кечириб, айни шу поездда Хўжакентга борган эди.

Ҳаракат давомида давлатимиз раҳбари мутасаддиларга Тошкент ва Хўжакент оралиғидаги темир йўлга туташ майдонларни 2025 йилги реновация дастурига киритиб, уларни тартибга келтириш ҳамда йўналишдаги эгри қисмларни тўғри қилиб қайта қуриш орқали кунлик экспресс поездлар қатновини кўпайтириш ва кўпроқ йўловчиларга хизмат кўрсатиш учун шароит яратиш бўйича топшириқ берган эди.  

Орадан қарийб 1,5 ой ўтар-ўтмас топшириқнинг бир қисми бажарилиб, «Чиноркент» темир йўл бекати қуриб битказилди ҳамда жорий йил 22 январь куни фойдаланишга топширилди. «Ўзбекистон темир йўллари» АЖ томонидан «Хўжакент» ва собиқ «Чинор» темир йўл бекатларини боғловчи транспорт алоқасини яратиш лойиҳасига мувофиқ, тажрибали темирйўлчиларнинг саъй-ҳаракати билан Хўжакентдан Чиноркентгача 1,5 километр масофага темир йўл қурилди.  

Шу муносабат билан ўтказилган тадбирда Транспорт прокуратураси, «Тошкент минтақавий темир йўл узели» филиали, «Ўзтемирйўлйўловчи» АЖ раҳбарияти, Ўзбекистон Республикаси туризм қўмитаси бошқарма бошлиқлари, фахрийлар ҳамда оммавий ахборот воситалари вакиллари иштирок этди.  

Тадбир қатнашчилари ушбу темир йўл бекатида йўловчиларга яратилган қулайликлар билан яқиндан танишди. Қисқа вақт мобайнида бу ерда 150 метр узунликда перрон ҳамда соябон қуриб фойдаланишга топширилди. Шунингдек, имконияти чекланган йўловчилар учун сирғанишга қарши плиталар ўрнатилди ва йўловчилар учун ер ости туннели барпо этилди.  

Таъкидлаш жоизки, айни кунга қадар ушбу ҳудудга келадиган йўловчилар электропоездда “Хўжакент” бекатигача келиб, ундан буёғига автомобилларга ўтириб келишар эди. Бу йўловчиларга ноқулайлик туғдирарди. Эндиликда бундай ноқулайликлар бартараф қилинди. Яъни, Тошкентдан йўлга чиққан йўловчилар, сайёҳлар замонавий электропоездда «Чиноркент» темир йўл бекатига етиб келиб, шу ернинг ўзидан бемалол дам олиш масканларига чиқиб кетишлари мумкин.  

Нозимбек Мардонов,  

ЎзА