Миллий матбуот марказида Кадастр агентлиги Фарғона вилояти бошқармаси томонидан ўтган йилда амалга оширилган ишлар ва жорий йилда бажарилиши лозим бўлган устувор вазифаларга бағишланган матбуот анжумани бўлиб ўтди.
Кадастр агентлиги Фарғона вилояти бошқармаси томонидан олиб борилган тадбирлар давомида вилоятда ўтган йилда 1 минг 50 ҳолатда 213,7 гектар ер майдонлари ўзбошимчалик билан эгаллаб олингани аниқланди.
Ушбу ҳолатлар юзасидан Кадастр агентлиги вилоят бошқармаси томонидан ер қонунбузилиш ҳолатларини содир этган шахсларга нисбатан ёзма кўрсатмалар юборилган. 389 ҳолатда 83,1 гектар ер майдонларида йўл қўйилган қонунбузилиш ҳолатлари жойида бартараф этилган.
– Ер қонунбузилиш ҳолатларини содир этган айбдор шахслар томонидан қурилган қурилишларни буздириш ҳамда ер майдонларини туман захирасига қайтариш мақсадида 543 ҳолатда судларга даъво аризалари киритилди, – дейди Давлат кадастрлари палатаси Фарғона вилояти бошқармаси бошлиғи Равшан Мирзаҳмедов. – Юқоридаги қайд этилган ҳолатлар юзасидан МЖтКнинг тегишли моддалари билан 2956 ҳолатда 8 миллиард 855 миллион миқдорида маъмурий жарима қўлланилиб, 4 миллиард 103 милллион сўми ундирилди. Жиноят аломатлари мавжуд ҳуқуқбузарлик ҳолатлари юзасидан 118 ҳолатда прокуратура органларига тўпланган ҳужжатлар тақдим этилди. Ўтган йил мобайнида Кадастр агентлиги ҳамда Давлат кадастрлари палатаси Фарғона вилоят бошқармаларига турли манбалар орқали жами 3 минг 43 та мурожаат келиб тушган. Мазкур мурожаатлар малакали мутахассислар томонидан қонунда белгиланган тартибда ўрганиб чиқилиб, 2 минг 170 таси ҳал этилган.
Матбуот анжуманида қайд этилишича, 2021 йилнинг 1 майидан бошлаб янги интеграциялашган ахборот тизимида қишлоқ хўжалиги ерларини электрон шаклда давлат рўйхатидан ўтказиш бошланди. Илгари қишлоқ хўжалиги ерлари электрон шаклда рўйхатдан ўтказилмаган.
Шунингдек, ўтган йил ҳолатига 72 минг 38 фермер ва бошқа қишлоқ хўжалиги корхоналарининг 370 минг 970 гектар ер участкалари онлайн геопортал орқали Миллий географик ахборот тизимида тўлиқ киритилди.
Шаҳноза Маматуропова, ЎзА