Саудия Арабистони пойтахти Ар-Риёдда мукофот жамғармаси 1 миллион 550 минг АҚШ долларидан иборат “Esports World Cup Chess” турнири ўтказилмоқда. Мусобақанинг кеча якунланган баҳсларида Нодирбек Абдусатторов ғалабага эришган бўлса, Жавоҳир Синдоров хитойлик гроссмейстер Вей Ига йўл берди.

“Д” гуруҳида “NAVI” жамоаси сафида дона сураётган Абдусатторов қора доналарда америкалик Фабиано Каруанага қарши кечган баҳснинг илк партиясида муваффақиятга эришди. Иккинчи партияда АҚШ вакили ҳисобни тенглаштирди. Ҳал қилувчи баҳсда Нодирбек ФИДЕ рейтингида 3-ўринда бораётган рақибини доғда қолдирди.

Польшалик Ян-Кшиштоф Дудага қарши кечган плей-офф босқичининг дастлабки ўйинларида муроса йўли танланди. Ғолибни аниқлаш учун кечган охирги партияда Польша вакилининг кичик хатосидан унумли фойдаланган ҳамюртимиз ғолибликни тантана қилди.  

Бугун, 31 июль куни Нодирбек Абдусатторов “Esports World Cup Chess” турнирининг 1/4 финалида Франция шарафини ҳимоя қилаётган Алиреза Фирузжага қарши дона суради.

Айтиш лозим, нуфузли мусобақанинг 1/8 финалида Магнус Карлсен Нихал Сарин билан, Левон Аронян Ҳикару Накамура билан, Аржун Эригаиси Ян Непомняший билан баҳс олиб боради.

Чорак финал иштирокчиларининг жойлашувига эътибор қаратилса, Нодирбек Абдусатторов яна бир бор собиқ жаҳон чемпиони Магнус Карлсен билан рўбарў келиши мумкин. Бунинг учун Абдусатторов аввало Алиреза қаршилигини енгиб ўтиши, Аржун Эригаиси-Ян Непомняший жуфтлиги ғолибидан устун келиши, ўз навбатида Карлсен ҳам “XVIII Tashkent Open” турнири ғолиби Саринни мағлуб этиши, Аронян-Накамура қарама-қаршилигида омадли чиққан шахматчини омадсизликка учратиши керак бўлади.

Турнир 1 августга қадар давом этади.

Т.Рўзиев,

ЎзА