Бугун, 1 август куни Саудия Арабистони пойтахти Ар-Риёдда мукофот жамғармаси 1 миллион 550 минг АҚШ долларидан иборат “Esports World Cup Chess” турнирининг финал баҳсида Магнус Карлсен Алиреза Фирузжа билан куч синашади.

Кеча киберспорт йўналишида ўтаётган нуфузли турнирнинг 1/4 финалида Нодирбек Абдусатторов Франция вакили Алиреза Фирузжа билан рўбарў келди.

Қизиқарли кечган ўйиннинг иккита партиясидаги ўйинлар натижасига кўра, Франция вакилининг қўли баланд келди. Абдусатторов қаршилигидан ўта олган Алиреза Фирузжа ярим финалда Аржун Эригаисини ҳам доғда қолдиришга муваффақ бўлди.

Чорак ва ярим финал баҳсларида Нихал Сарин ва Ҳикару Накамурадан устун келган Магнус Карлсен бугун ғолиблик учун кечадиган курашда Алиреза Фирузжага қарши дона суради.

Нуфузли мусобақанинг 3-ўрни учун ўтадиган “ақл жанги”да Аржун Эригаиси ва Ҳикару Накамура тўқнаш келади.

Киберспорт йўналишида илк бор ташкил этилган “Esports World Cup Chess” турнирининг чорак финалигача етиб келган Нодирбек Абдусатторов мусобақа низомида белгиланган 85 минг АҚШ доллари, турнирни 13-ўринда якунлаган Жавоҳир Синдоров 50 минг АҚШ доллари соҳиби бўлди.

Т.Рўзиев, ЎзА