Эрон Вашингтонга очиқ таҳдид қилди
Яқин Шарқдаги кескинлик яна хавфли нуқтага яқинлашмоқда. Эрон расмийлари мамлакат яна ҳужумга учраса, уранни 90 фоизгача бойитиш масаласи кўриб чиқилишини маълум қилди. Бу даража халқаро экспертлар томонидан ядровий қурол учун етарли чегара сифатида баҳоланади.
Ислом Республикаси парламенти миллий хавфсизлик ва ташқи сиёсат қўмитаси вакили Иброҳим Ризоий Теҳрон ушбу мавзуни парламент даражасида муҳокама қилиши мумкинлигини айтди. Айни пайт АҚШ разведкаси Эронда 60 фоизгача бойитилган юзлаб килограмм уран захираси сақланаётганини тахмин қилмоқда.
Президент Дональд Трамп эса Эрон билан эришилган сулҳ “ҳаёт-мамот ҳолати”да эканини билдирди. У Теҳрон юборган янги таклифни кескин танқид қилиб, ҳатто ҳужжатни охиригача ўқимаганини таъкидлади. Вашингтон Эронга кучли бойитилган уранни мамлакатдан олиб чиқиш талабини қўйди. Теҳрон эса бу шартни қабул қилишдан бош тортяпти.
Шу билан бирга Ислом инқилоби қўриқчилари корпуси Ҳурмуз бўғозини янги “кенг ҳарбий зона” деб эълон қилди. Эрон ахборот агентликлари стратегик ҳудуд энди аввалги 20-30 миллик йўлак эмас, балки 200-300 миллик улкан амалиёт майдони сифатида қўрилишини ёзмоқда. Бу эса жаҳон нефть таъминоти учун янги хавф белгиси бўлиши мумкин.
Ҳозир "Brent" нефти 107 доллардан юқорига кўтарилди, OPEC ишлаб чиқариши сўнгги ўн йилликлардаги энг паст даражага тушди. Вашингтон Эрон нефтини Хитойга етказишда гумон қилинган компанияларга қарши янги санкция жорий қилди.
Кузатувчилар фикрича, ҳозирги вазият шунчаки дипломатик инқироз эмас. Эрон ядровий босимни кучайтирмоқда, АҚШ эса Хитой орқали Теҳронга таъсир ўтказишга уриняпти. Бу ҳаракатлар минтақадаги можаро янада кенгайиш хавфини оширмоқда.
Мусулмон Зиё, ЎзА
