Эрон терма жамоаси Жаҳон чемпионатида иштирок этиш учун виза олди.
Эроннинг Анқарадаги элчиси Муҳаммад-Ҳасан Ҳабиболлазода миллий терма жамоа футболчилари 2026 йилги Жаҳон чемпионатида иштирок этиш учун зарур бўлган визаларни қўлга киритганини маълум қилди.
Маълумот учун, мазкур нуфузли турнир жорий йилнинг 11 июнидан 19 июлига қадар АҚШ, Канада ва Мексика майдонларида бўлиб ўтади.
ИРИБ ахборот агентлиги элчининг сўзларига таяниб хабар беришича, терма жамоа аъзолари учун визалар қисқа муддатда 48 соат ичида расмийлаштириб берилган. Бунда футболчиларнинг Мексика элчихонасида шахсан бўлишлари ва бармоқ изларини топширишлари талаб этилмаган.
Эслатиб ўтамиз, Эрон ва АҚШ ўртасидаги кескин қуролли тўқнашувлар туфайли форсларнинг ушбу дунё биринчилигидаги иштироки катта сўроқ остида қолаётган эди. Дастлабки режага кўра, Эрон терма жамоаси АҚШнинг Аризона штатида жойлашиши керак эди.
Бироқ хавфсизликка таҳдидлар мавжудлиги сабабли, Эрон томони ФИФАга расмий илтимос билан чиқиб, ўз машғулот базасини Мексикага кўчиришни сўради. Кейинчалик Эрон футбол федерацияси президенти Меҳди Таж ушбу сўров ташкилот томонидан ижобий ҳал этилганини тасдиқлаганди.
Ф. Яхшибоева, ЎзА
