Эрон ташқи ишлар вазирининг Путин билан учрашуви кутилмоқда (+видео)
Эрон ташқи ишлар вазири Аббос Арағчий Москвада Россия президенти Владимир Путин билан учрашади, деб хабар берди DW нашри.
Учрашув 27 апрель куни бўлиб ўтади. Аббос Арағчий Россия расмийлари билан Эрон бўйича тинчлик музокаралари, ўт очишни тўхтатиш ва вазият ривожини муҳокама қилади.
Россия президенти матбуот котиби Дмитрий Песков ҳам бу учрашув режалаштирилганини тасдиқлади. 26 апрель куни Эрон ташқи ишлар вазири 24 соат ичида иккинчи марта Исломободга борди ва у ердан Москвага йўл олди. У шунингдек Оманга ҳам ташриф буюрган. Бу давлат ҳам АҚШ ва Исроил билан боғлиқ можароларда воситачи сифатида иштирок этмоқда.
Арағчий 25 апрель куни ижтимоий тармоқдаги чиқишида Покистонга сафари “жуда самарали” бўлганини айтди. У Исломободнинг “тинчликни тиклашга қўшаётган ҳиссаси”ни юқори баҳолади.
Шунингдек, у Эронга қарши урушни тўлиқ тўхтатиш бўйича позицияни баён қилганини айтар экан, АҚШ нинг дипломатияга қанчалик жиддий ёндашиши айни дамдаги масалаларни ечишда маълум бўлади, деди.
АҚШ президенти Дональд Трамп 25 апрель куни ўз вакилларига Исломободга бормасликни буюрганини айтди. Унинг сўзларига кўра, сафарга жуда кўп вақт кетади. “Агар Эрон томони гаплашмоқчи бўлса, қўнғироқ қилишлари мумкин”, — деди у.
Шу тариқа, АҚШ ва Эрон ўртасидаги ўт очишни тўхтатиш бўйича навбатдаги музокаралар 25 апрель куни бошланмасданоқ тугади.
Эрон ташқи ишлар вазирининг Россия президенти билан кутилаётган бугунги учрашуви АҚШ ва Эрон ўртасидаги зиддиятнинг барҳам берилишига қандай таъсир кўрсатиши ҳозирча номаълум.
<iframe width="640" height="420" src="https://www.youtube.com/embed/AwqhVvk0xdM" title="Eron tashqi ishlar vazirining Putin bilan uchrashuvi kutilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> Кенжа Бекжонов, Улуғбек Тўхтаев (видео), ЎзА
