Энди Урганчдан Хивага 42 дақиқада етиб боришингиз мумкин
Хивага саёҳат қилишни режалаштираётганлар учун яна бир қулай имконият яратилди. Урганч ва Хива ўртасида замонавий, тезкор ва қулай электропоезд қатнови йўлга қўйилди. Энди йўловчилар манзилга замонавий шароитлар ва қисқа вақт ичида етиб боришлари мумкин.
“Урганч Аэровокзал – Хива – Урганч Аэровокзал” йўналишида Хитой Халқ Республикасининг CRRC Dalian Co., Ltd. компанияси томонидан ишлаб чиқарилган CR200J русумли замонавий тезюрар электропоезд йўловчиларга хизмат кўрсатмоқда. 6 та вагондан иборат поезд 415 нафар йўловчини ташишга мўлжалланган бўлиб, соатига 160 километргача тезликда ҳаракатланади.
Йўловчилар қулайлиги ҳам эътибордан четда қолмаган. Электропоездда “Эконом” тоифасидаги замонавий ўриндиқлар, ҳар бир ўриндиқда USB қувватлаш қурилмалари ва вагон ичида мақбул ҳароратни таъминловчи иқлим назорати тизими мавжуд.
Шунингдек, ногиронлиги бўлган йўловчилар учун махсус жойлар ҳам ажратилган. 42 дақиқада манзилга етиш мумкин.
Муҳайё Тошқораева, ЎзА
