Президент топшириғи амалда
Охирги йиллар Тошкент вилоятида электротехника саноати етакчи ва жадал ривожланиб бораётган драйверга айланди. Таҳлилларга кўра, 2017 йил ҳудудда 26 та корхона ҳисобига электротехника (асосан трансформаторлар) саноат маҳсулотлари ишлаб чиқариш ҳажми 407,2 миллиард сўмни ташкил этган.
Ҳозирги кунда эса 140 тадан ортиқ корхоналар томонидан ишлаб чиқариш ҳажмлари қарийб 10 баробарга ошганини кўриш мумкин. Бу йил ҳудудда фаолият юритаётган электротехника саноат корхоналари маҳсулотлари вилоятнинг умумий саноат ҳажмида улуши 4,0 фоиздан ошди. Шундан компьютер, оптик маҳсулотлари ва электр ускуналари ишлаб чиқариш ҳажми кўпроқ.
Мутахассисларнинг таъкидлашича, вилоятда 2024-2027 йиллар электротехника саноати йўналишида жами 1,7 миллиард долларлик 24 та лойиҳалар амалга оширилади. Улар ишга туширилиши билан 3 минг нафардан зиёд янги иш ўринлари ташкил этилади. Масалан, Чирчиқ шаҳрида Хитой инвестицияси ҳисобига жами қиймати бир миллион долларлик “Tizimlar va Elektr Yuritmalar Zavodi” МЧЖ ҳам ўз фаолиятини бошлаган. Бу ерда асосан электр коммутаторлар тайёрланади ва газ турбинали двигателлар таъмирланади.
Бундан ташқари, Оҳангарон ҳамда Паркент туманларида жами 362 гектар ер майдонида “Eltech Industrial” технопарки, яъни Мис кластери ташкил этилган. Ҳозирги кунда бу ҳудудда умумий қиймати 270,6 миллион долларлик 18 та инвестиция лойиҳаси шакллантирилган. Улар ишга туширилиши натижасида 3 мингдан ортиқ янги иш ўрни яратилади. Шунингдек, 16 та янги турдаги электротехника маҳсулотлари ишлаб чиқарилиши режалаштирилган.
Жумладан, шулардан битта лойиҳа – “Poly-Factor” корхонаси ишга туширилган. Бу ерда кабель маҳсулотлари ишлаб чиқарувчилар учун поливинилхлорид хомашёсидан композит маҳсулотлар тайёрланади. Олмалиқ шаҳрида Хитойнинг “Xolli Grup” компанияси билан ҳамкорликда “Буюк Ипак йўли” индустриал технопарки ҳамда Чирчиқ шаҳрида Хитойнинг “China Construction Fifth Engineering Division” компанияси билан ҳамкорликда “Икки ҳудуд – бир парк” индустриал технопарки махсус саноат зонаси ташкил этилди.
Маълумки, яқинда Президентимиз раислигида ўтказилган электротехника соҳасида ишлаб чиқариш, экспорт ва инвестиция оқимини янада кўпайтириш чора-тадбирлари юзасидан видеоселектор йиғилишида ҳам мутасаддиларга экспорт учун айланма маблағ миқдорини ошириш, саноат электротехникаси учун лизинг тизимни кенгайтириш каби масалалар бўйича кўрсатмалар берилди.
А.Мусаев, ЎзА.